رانيا يوسف لـ"وشوشة": “الناس متعودة عليا كيوت لكن أحب التحدي وتجربة شخصيات جديدة”
تحدثت الفنانة رانيا يوسف عن دورها الجديد في مسلسل “أهل الخطايا”، الذي يعرض ضمن دراما رمضان الجاري، ويظهرها بشكل مختلف عما اعتاد عليه الجمهور، قائلة: “الناس متعودة على رانيا الكيوت الليدي، بس أنا مش خايفة إنهم يشوفوني بشكل جديد، بالعكس، دة ممتع جدًا لأي ممثل".
وأضافت رانيا يوسف في تصريح خاص لـ"وشوشة": “قبل كدة قدمت السبع وصايا، وشافوني في شكل تاني، وأنا بحب التحدي وتجربة شخصيات جديدة، وأشوف هل هقدر أقدمها ولا لأ".
وتابعت رانيا حديثها عن الحب والمشاعر، مؤكدة أنها جريئة ولا تخشى التصريح بمشاعرها، مضيفة: “لو رجع بيا الزمن لأول كراش في حياتي، كنت هقوله عادي جدًا إني بحبه، معنديش أي مشكلة خالص، أنا جريئة ومبحبش اللف والدوران".
وأضافت عن رأيها في المبادرة بالحب: “المهم إن الواحد يعبر عن مشاعره لو حس إن الطرف التاني ممكن يستجيب، لكن لو مفيش استجابة، يبقى مفيش داعي للمصارحة".
وحول إمكانية التحكم في الحب كما لو كان بـ”ريموت كنترول”، قالت: “لا أخليه يمشي بسرعته الطبيعية، لا أسرّع ولا أبطّئ، كل حاجة بتيجي في وقتها المناسب".
أما عن شخصيتها الرومانسية فأجابت: “مش دايمًا، حسب الموقف وحسب الشخص اللي معايا".
وعن ذكريات رمضان بين الماضي والحاضر، أكدت: “أكيد كنت هحب أرجع لأيام طفولتي في رمضان، زمان كان ليه طعم خاص".
واختتمت رانيا يوسف حديثها قائلة: “من أجمل ذكرياتي في رمضان، كنا بنجمع أصحابنا ونخبط على الجيران عشان نجمع فلوس لزينة رمضان، ونصلي التراويح مع بعض، وفي ليلة القدر، كل بيت كان بيعمل طبق ونحس بروح العيلة الحقيقية".