نور إيهاب: مكالمات "السيلز" ساعدتني على التحضير لدوري في "6 شهور"
استضاف يوسف التهامي وفانا إمام ببرنامج "عيش صباحك" على "نجوم إف.إم"، الفنانة نور إيهاب للحديث عن أحدث أعمالها الفنية.
وبدأت الفنانة نور إيهاب في الحديث عن دورها في أحدث أعمالها الدرامية مسلسل "6 شهور"، والذي ظهرت فيه بشخصية "لطيفة"، حيث قالت: "شركة الإنتاج كلموني وقعدت مع المخرج مصطفى صولي وقرينا الورق وأحلى حاجة إن أول بطولة مش مطلقة لكن مع نور النبوي، لإن المسئولية مش كلها عليا ودي كانت حاجة مريحة جدًا، وكمان الشخصية كانت لذيذة جدا وهي كانت بنت بسيطة وعشوائية ومالهاش في أي حاجة في الحياة، فكانت بالنسبة لي حاجة حلوة في أول دور كبير".
وعن خطوتها الأولى في البطولة على الشاشة، أوضحت: "مكنتش هاخد الخطوة دي غير لما حسيت إن الناس كانت بتحب وجودي على الشاشة فقلت أوك هبتدي أبقى بطلة مع حد تاني ده تمام، وأنا وبنات جيلي بيتعرض علينا البطولة كذا مرة بس ممكن يكون ورق مش قوي أو شركة إنتاج جديدة، لكن مهم الواحد ما يبقاش متحمس وخلاص وياخد الخطوة المرعبة دي".
وقالت الفنانة نور إيهاب إن مكالمات المبيعات العقارية أفادتها شكل ما في التحضير لدورها في مسلسل "6 شهور"، موضحة: "مع بداية التصوير ابتديت أسمع مكالمات السيلز اللي بتجيلي وبقيت بشوف بيتكلموا إزاي، وهم شغلهم صعب ومحتاج مجهود وصبر وكل واحد له طريقته في البيع فكنت بحاول أشوف الناس المختلفة بتبيع إزاي علشان كل واحد له شخصية".
كما تطرقت للثنائية التي تكررها في العمل مع الفنان نور النبوي على الشاشة بعد جزئي فيلم "الحريفة"، وقالت: "يعتبر تاني عمل مع نور النبوي، لكن في (6 شهور) جت صدفة لأن كان فيه ترشيحات قبلي لنفس الدور لحد ما بيستقروا على حد في الآخر، ومحدش بيرشح حد تاني أوي كممثلين لكن بتبقى شركة الإنتاج، وهم أكيد بيبقوا شايفين ده إن الدويتو كان في الحريفة لطيف فممكن نستغله في المسلسل".
وأضافت الفنانة نور إيهاب: "أول ما خلص التصوير ولحد بداية العرض كنت كل يوم هتجنن علشان أشوف ردود فعل الناس وكنت أول مرة أكون مرعوبة جدًا، لكن ردود الأفعال كانت لذيذة أوي".
كما قالت إنها لن تأخذ قرار البطولة المطلقة قبل أن تكون مستعدة لهذه الخطوة، موضحة: "شايفة إني لسه عاوزة أشتغل على نفسي في حاجات أكتر وأخد ورش معينة نفسي فيها ومش هاخد الخطوة دي غير لما أكون مستقرة 100% لأن هذه خطوة سلاح له حدين ممكن توقعني أو تعمل حاجة حلوة أوي".