أحمد سلامة لـ "وشوشة": سارة بنتي مش شايلة هم شغلها لأني موجود وبصرف
كشف الفنان أحمد سلامة عن رأيه في الانتقادات التي واجهها هو وابنته سارة في مشوارها الفني، مشيدًا بموهبتها واختياراتها الدقيقة في الأعمال التي تشارك فيها.
وتحدث سلامة خلال ندوة خاصة في “وشوشة”، بحضور الكاتب الصحفي مصطفى متولي، والزميلة منار بدر الدين، عن تفاصيل دعمه الدائم لها ونصائحه التي ساعدتها على بناء شخصيتها كممثلة مميزة، متوقعًا لها مستقبلًا مشرقًا في عالم التمثيل.
وأوضح سلامة، أنه في بداية الأمر كان يتأثر كثيرًا بالانتقادات الموجهة إليه وابنته سارة، حيث قال: "في الأول كنت بضايق وأزعل وأتعصب، لكن دلوقتي خلاص مبقتش بشوف الانتقادات دي ومبقتش بتاخد مساحة من تفكيري، ومع الوقت اكتشفت إن الفنان سواء عمل حاجة أو لأ، فهو دايمًا معرض للانتقاد.
وأضاف: بعض الناس واخدين موقف ضد الفنان لمجرد كونه فنان، مش لأي سبب تاني، رغم إن المهنة دي مرهقة جدًا، دلوقتي لو حد بعتلي أي حاجة عني أو عن سارة، مبقتش حتى أفتحها".
كما تحدث عن ابنته سارة، وقال: "هي مش مظلومة فنيًا، المشكلة إن سارة بتحب تختار شغلها جدًا، ومش فارق معاها تشتغل كتير أو قليل، المهم تشتغل الحاجة اللي بتحبها، وهي كمان مش شايلة هم لأنها عارفة إن بابا موجود وبيصرف، كل فترة يعجبها مشروع معين، فتروح تشتغل فيه"، مؤكدًا على موهبة ابنته، قائلا: "سارة من الممثلات الموهوبات جدًا، وهتكون من أهم الممثلات في مصر".
ووجه لها نصيحة من خبرته قائلًا: "أول ما بدأت كنت معاها أغلب الوقت، وكانت دايمًا بتاخد رأيي في شغلها وتفاصيل شخصياتها، لكن دلوقتي اكتسبت خبرة كبيرة، وهي فعلاً ممثلة شاطرة وموهوبة".