"السكر وصل 500".. داليا مصطفى تتحدث لـ "وشوشة" عن رحلتها مع مرض السكري

دعمت الفنانة داليا مصطفي محاربي مرض سرطان الثدي بوجودها اليوم في مستشفى بهية.

وأعربت داليا مصطفي، في تصريح خاص لـ "وشوشة"، عن مدي سعادتها بوجودها في بهية قائلة: "أنا جاية النهارده علشان استمد القوة منكم".

وتحدثت عن رحلتها مع مرض السكر: "أنا كنت بحب السكريات وفي اليوم ده أنا كنت واكلة مانجة وجاتوه وروحت أعمل تحليل علشان أطمن علي نفسي، ومن هنا أكتشفت أن عندي مرض السكر، وكان بنسبة 210، وكان رقم عالي بس مش عالي أوي، وجاتلي صدمة إن في حاجة غلط، ومقبلتش الفكرة، وروحت واكلة جاتوه تاني، ونزلت الصيدلية أقيس السكر لاقيته 500، طبعا ليه ارتفع علشان الفكرة سيطرت عليا إني مريضة وعندي السكر، و ده طبعا أثر علي نفسيتي".

وأضافت: "أنا لو مكنتش خليت الفكرة تسيطر علي دماغي مكنتش ارتفعت كده، و ده حصل بسبب اني سلمت للفكرة دي، وعرفت من الدكتور إن مريض السكر حركته صعبة، ومن هنا قولت انا مش هقعد وهتحرك".

وتابعت حديثها : "وعرفت السبب وده إحساسي إن من وأنا عندي 6 سنين كان في حد غالي عليا، وكل ما اسأل عنه يقولولي في المستشفى، فعرفت إنه مصاب بمرض السكر وتم بتر أصبعه، وأعتقد أن ده بسبب إني خزنت الأفكار دي في اللاوعي في دماغي لاني كنت بحبه وعايزة أبقي زيه و حصل ده".

واختتمت حديثها قائلة: "قوة عقلك الباطن قادرة تغير مسار حياتك للأسوء أو للأحسن، وده اللي حصل معايا أنا قولت لا انا مش هستسلم للفكرة دي، و أول خطوة أخدتها إني حبيبت مرضي وبقي جزء مني، وأول مسلسل ليا بعد معرفتي بمرض السكر مسلسل العصيان، وكان من أنجح مسلسلاتي".