محمد منير: مفيش قوة تبعدني عن المزيكا وأنا زي الجن

حل الفنان محمد منير ضيفًا مع الإعلامية سهير جودة، وذلك احتفالاً بعيد ميلاده.

ونشرت سهير جودة مقطع فيديو عبر صفحتها الرسمية على موقع التواصل الاجتماعي "فيسبوك"، من داخل منزل محمد منير كشفت فيه عن العديد من أسرار حياته الشخصية.

وبدأ محمد منير حديثه عن مدى حبه للمزيكا، قائلاً: "مفيش قوة قدامي تبعدني عن المزيكا حتى لو كانت قوة جمالية وأنا قلبت الكرسي عشان استمتع بالمزيكا اللي هي بتلعبها ولقيت سيدة جميلة ماسكة كامنجا روحت لافف الكرسي وبقيت اتفرج".

وأضاف: "القوة الموسيقية تجذبني أكثر من المرأة الجميلة وبقوة، واللوحة دي فيها 3 أسطوانات بلاتينية وواحدة دهب خدتها من يونيفرسال في فرع برلين".

وعن صورة والديه، قال: "دي صورة متصورينها سنة 1939 بشوف جمال أمي وشياكة أبويا وإزاي هما كانوا.. وشعر أمي معنز كأنها طالعة من الحمام كده لذيذة وجميلة وأبويا كان شيك أوي، وهو كان سياسي سعدي وساب الوفديين وراح للسعديين".

وتحدث عن تفاصيل لوحة له وهو ماسكاً بميكرفون، وقال: "واللوحة دي مصر، أنا شادد بأيدي السيدة الجميلة دي ودي لصالح مصر وأي خير لمصر وحطيت في الصورة دي الهلال والصليب وده معيار إن إزاي بحب الأديان المنتشرة في مصر الإسلام والقبطي لأن أنا معنديش عنصرية تجاه الحاجات دي، وأنا بحب الوطن وبس".

وتابع: "أنا مقدرش أعلن إني بحب شيء ولكن من تصرفاتي وفني طبعا بحب الوطن وأنا مهموم بيه ومهموم بمشاكله وحلوله".

وعن سبب حبه للفن التشيكلي، أوضح: "أنا خريج كلية فنون تطبيقية، والألوان واللوح والمعنى الأثري للمكان غالب عليا وعلى تصرفاتي".

وعن علاقته بالكلاب التي يتولي تربيتهم: "والـ 4 كلاب دول بعتبرهم ولادي وهما اللي مونسني في البيت غير المزيكا وفيهم مني كتير وبيسمعوا مزيكا وبيناموا على صوتها".

وطمأن محمد منير جمهور على حالته الصحية، وقال: "أنا بخير وزي الجن ومعنديش حاجة".

واختتم: "كل الكراسي اللي موجودة في بيتي ماعدا الكنبة اللي قاعد عليها دي لسيدة لبنانية فاضلة قالتلي أنت عارف أنت حاطط الصور دي كلها والكراسي كلها منفردة لأن مفيش في حياتك امرأة فأنا زعلان من يومها لأن هي اتهمتني بالوحدة وإن مفيش كرسي إلا بيسع شخص واحد وده بيتي وسره وجماله".