أحمد المالكي: عمرو دياب مش ديكتاتور وبيسيب كل واحد يشتغل براحته
كشف الملحن أحمد المالكي عن تفاصيل تعاونه مع الفنان عمرو دياب وعن علاقته به، وتحدث في تصريح خاص لـ"وشوشة" عن مواقف له مع عمرو دياب.
وقال أحمد المالكي عن شخصية الهضبة: "عمرو فعلاً مش ديكتاتور، عمرو عنده حتة التخصص كل واحد بيعمل حاجة، الملحنين مثلا بس كل ملحن بيشتغل معاه بيسيبه براحته ليه توزيع ورؤيته ودارس تأليف موسيقي وعمرو مزيكاتي جامد بس بيسيب كل واحد براحتك لكن مش ديكتاتور".
وتابع: "بس المشكلة اللي بتواجهني وبتواجه معظم الناس إن أغاني كتير مش بتنزل وابقى فرحان بيها جدا واقول هي نازلة بكرة دي أصعب حاجة بالنسبالي في التعامل مع عمرو ودي الحاجة الوحيدة اللي بتضايقني في الشغل مع عمرو بس الشغل مع عمرو ممتع جداً".
وعن موقف لعمرو دياب له، أوضح: "أنا فاكر لما خد أغنية"أول كل حاجة" مكناش قريبين وبنتكلم وكان عن طريق سامح سعيد الملحن ولما خد "أول يوم في البعد" بعد ماحضرت لقيته اتصل بيا قعد يشكرلي فيها وقالي إنت في جملة بتقولها عمر مابين عمرين قعد يمجدلي في الكلمة دي ويشرحلي ودي معناها إن اللي فات حاجة واللي جاي حاجة واليوم ده لوحده، وحسيت فعلاً إنها حاجة حلوة، حتى لما الأغنية نزلت وبعتله وفرحان اوي قالي إنت شاعر موهوب وتستحق فدي كلمة فرحت بيها جداً".
واختتم: "وأنا مش هتعامل مع حد مش بحبه وأنا الحمد لله أي حد اشتغلت معاه بلا استثناء نجحت معاه حتى اللي عملتله أغنية واحدة في حياته نجحت مثلاً محمد رمضان عملتله أغنية واحدة اللي هي "مصباح علاء الدين" وأنا قبل الأغاني كنت بشتغل في بنك ومشيت عشان ميبقاش في حاجة مفروضة عليا، ولو حد ديكتاتور مش هشتغل معاه وحتى لو موهوب".