وليد فواز: ملمستش رحاب الجمل في مشهد ضربي ليها
تحدث الفنان وليد فواز عن كواليس مشاهده مع الفنانة رحاب الجمل ومحمد القس وتعاونه معهما، في مسلسل “برغم القانون”، بطولة الفنانة إيمان العاصي.
وكشف وليد فواز في تصريح خاص لـ" وشوشة" عن مشهد ضربه لرحاب الجمل، معربًا عن سعادته بنجاحه، وأوضح: "مشهد ضربي لرحاب الجمل ده أنا بحبه والحقيقة إني ملمستشهاش فمبسوط إن أنا وصلت للمستوى ده من الخبرة، وإزاي تقنع الناس إن أنت بتعمل حاجة زي كده وإنت أصلاً ملمستش اللي قدامك فدي حاجة بسطتني جداً".
وتحدث عن مشهده مع محمد القس وعن رد فعل الجمهور عليه، قائلاً: "مشهد وأنا باخد الفلوس من أكرم مشهد ظريف وكنت مبسوط بيه لإن محمد القس اعتقد إن ده المشهد الوحيد اللي بنقابل بعض غالباً في المسلسل، وأنا بحب ألعب مع الجمهور اوديه واجيبه دي حتى بتبقى جميلة في التمثيل، وكان مشهد لذيذ ولطيف، وكل مشهد أنا بلعبه ببقى مستمتع بيه".
كما كشف عن رأيه في تمكين المرأة في تلك الفترة، وأوضح: "الستات بقت واخدة حقها وتمام ويدونا جنب جنبهم، واعتقد إن ده عصر المرأة الفترة دي وده من أزهى العصور اللي المرأة بتاخد فيه حقها، واعتقد إنه في ظل الجمهورية الجديدة الستات بقت تاخد حقها جداً ودي حاجة إيجابية الحقيقة والدولة بقت تهتم جداً بدور المرأة وتمكينها وتعديل قوانين مكنتش بتديها حقوقها، وأنا مبسوط جداً بالتطور الدستوري والتشريعي اللي بيحصل للمرأة".