في يوم ميلاده.. خالد تاج الدين يكشف أسرارًا عن العمل مع عمرو دياب
هنأ الشاعر الغنائي خالد تاج الدين الفنان عمرو دياب بمناسبة عيد ميلاده الذي يحل اليوم 11 أكتوبر.
وحرص خالد تاج الدين على تهنئة عمرو دياب من خلاص تصريح خاص لـ"وشوشة"، كشف فيه عن كواليس تعاونهما معًا.
وتحدث خالد تاج الدين عن علاقته بعمرو دياب، قائلاً: "طبعاً عمرو دياب إحنا أصدقاء من زمان بقالنا دلوقتي داخلين في 20 أو 21 سنة".
وتابع: "إحنا من سنة 2001 اشتغلنا مع بعض كانت أغنية قولت ايه اللي هي قبل الوداع، وبعد كده عملنا رحلة طويلة لحد 2021 أغنية وأنا معاك، مروراً بأغنية "وبينا معاد" وأغنية "وماله وليلي نهاري قدام عيونك ووعدتك و ياما" وأغنية كاس العالم بتاعة محمد صلاح".
وأضاف: "وعمرو أنا عامله حوالي 20 أغنية تقريباً وفي حوالي 20 كمان منزلوش لإن إحنا بنشتغل كتير أوي نطلع حاجة حلوة في الآخر".
واستكمل: "وأنا دائماً بقول إن عمرو دياب إنسان متعب في الشغل ومتحبيش تشتغلي معاه بس بعد كده يتحب النجاح بتاعه ويتشاف بأنه التعب ده بيترجم لنجاح".
ووجه خالد تاج الدين رسالة لعمرو دياب قائلاً: "بقوله ياهضبة كل سنة وإنت طيب وكل سنة وإنت هرم من أهرامات مصر وإنسان مؤثر وفنان مؤثر في كل الأجيال، زي ما عبد الوهاب موسيقار الأجيال عمرو دياب مطرب الأجيال لأن عمرو دياب بشوف دلوقتي بعد الرحلة الطويلة بتاعته في الغنا من أول التمانينات ودلوقتي احنا في 2024 في أطفال عندهم 7 و8 و 10 سنين بيحبوا اغاني عمرو دياب القديمة والجديدة".
واختتم: "وانت يا عمرو مؤثر وتعيش وتأثر في كل الأجيال وتعيش وتنجح وتكسر الدنيا".
