وليد فواز لـ"وشوشة": أنا مبخافش من دخول تحدي جديد ومفيش شخصية شبه التانية

عبر الفنان وليد فواز عن سعادته بنجاح شخصية "ياسر" التي يجسدها في مسلسل "برغم القانون".

وكشف وليد فواز في تصريح خاص لـ"وشوشة" عن سبب حماسه للشخصية وتحضيراته لها، وأعرب عن سعادته بردود الأفعال حول شخصية ياسر قائلاً: "أولًا من جوايا بقول الحمد لله رب العالمين وإن ده كرم كبير أوي أكبر مما استحقه ونعمة كبيرة جداً رد فعل الجمهور اللي أدهشني، وأدهشني لإنه حصل في الحلقات الأولى، والطبيعي إنه بيحصل مثلاً بعد مرور 5 أو 6 حلقات، والحقيقة إنه حصل من أول ظهوري ودي حاجة أنا ممتن جداً لنعمة ربنا عليا وسعيد جداً إنه نجاح صافي بدون أي مؤثرات".

وعن سبب حماسه للشخصية، أوضح: "سبب حماسي لتقديم شخصية ياسر إنه أنا طول الوقت عندي قناعة إني مش بتنافس مع حد أنا بتنافس مع وليد فواز، فالحمد لله كل شخصية أنا بلعبها بتلاقي نجاح مع الجمهور والناس بتحبها، وكما يصفها البعض إنها أدوار الشر أو إن أنا شرير الشاشة زي ما بيقولوا، فأنا آخر نجاح قوي ليا نقدر نقول معلق في دماغ الناس وبيطلقوا عليه الشخصيات "التوكسيك" أو الشخصيات السامة أو الشخصيات اللي مش لطيفة هنقول شخصية "عبد الغني" في صوت وصورة".

وتابع: "فأنا جالي شخصية ياسر ده فأنا حبيت وإنه ممكن عادي جداً تكون شخصية لو أي ممثل عملها ممكن يعملها شبه شخصية معمولة قبل كده".

وأضاف: "الرهان الأكبر وحماسي إن أنا عايز أعمل شخصية مختلفة تماماً عن عبد الغني وإن شاء الله تنجح، وبفضل الله الشخصية دي نجحت زي ما عبد الغني نجحت، فبقى ياسر إن شاء الله الناس تفتكره وعبد الغني الناس تفتكره ورباح في حق عرب وشخصيات كتيرة عملتها وقبلهم معتمد في مسلسل "بدون ذكر أسماء"، فالقصة إن إنت كممثل هتعرف تعلي على نفسك كل مرة، وإن أنا بضرب رقم قياسي وبنافس نفسي وبحقق بطولات ليا أنا كـ وليد فواز".

واستكمل: "أنا مبخافش أبداً من دخول تحدي جديد، ومفيش حاجة اسمها شخصية شبه التانية،  أنا مش مؤمن إن في شخصية شبه التانية وكل شخصية ليها مفرداتها وليها سياقها وليها ظروفها وحاجات وعناصر كتيرة جداً تخليها مختلفة تمامًا عن أي شخصية، دي بتفرق حسب الممثل وشطارته إنه يعمل الشخصية دي غير دي حتى لو كان التشابه ظاهرياً حتى لو كاتب كتابة بتقول كده، ده الممثل والقصة في الممثل والمخرج وطالما إن المخرج والممثل دخلوا شغل في مخ كويس فاهم والممثل كويس هيطلع حاجة كويسة".