شادي مقار لـ"وشوشة": كواليس "برغم القانون" كانت عائلية جداً
تحدث المنتج شادي مقار عن كواليس مسلسل "برغم القانون" وعن الاستعدادات وتحضيرات العمل.
وكشف شادي مقار عن علاقته بأبطال المسلسل وعن التعاون معهم في تصريح خاص لـ"وشوشة".
وعبر شادي مقار عن سعادته بكواليس المسلسل، قائلاً: "أنا طبعاً حابب اتكلم عن كواليس برغم القانون، إيمان العاصي قد إيه هي كانت بتحاول تطلع أحسن ما عندها وعندها اجتهاد أنا مكنتش متوقعه، وإزاي هي عندها موهبة إنها قدرت تشتغل بعدد المشاهد الكبير واللوكيشن الكتيرة وكانت دائمًا معانا بمنتهى الحب وكانت بتبسط الكل".
وتابع: "محمد القس راجل هادي وبيعرف يشتغل بطريقة احترافية وساندني أنا شخصياً في مشاهد كتيرة وأنا وهو بقينا أصدقاء من خلال الكواليس، والعمل كله كان جو عائلي وكواليس عائلية جداً ودي كانت بتسهل علينا".
وأضاف: "هاني عادل مشاهدي معاه كانت قليلة بس كنت بروح أتدرب معاه وأقوله تعالى نتدرب على المشهد وكان بيشتغل معايا وكل الناس ساندتني وأنا بحبهم جداً".
كما تحدث عن وليد فواز وعن مساعدته له قائلاً: "وليد فواز الراجل ده محدش يكرهه خالص في الدور بتاعه، لإنه أحسن قلب وكان عندنا مشهد صعب كان في خناقة وأنا اتخنقت كتير وهو بيخنقني كان منزعج وقد ايه هو بيقف جنبي وكان فيه تناغم وكان فيه حب وخوف".
وأوضح: "كان المشروع بصعوبته الشديدة لإن اللوكيشن كان واصل لعدد ضخم وإرهاق ومع ذلك اللي كان بيهون علينا إن إحنا دايمًا صحاب وبنقعد مع بعض".
كما كشف عن موقف لـ إيمان العاصي، وقال: "مش هنسى عزومة إيمان العاصي عملت عزومة كبيرة لينا عشان لما حست إن الناس بدأت تتعب لقيناها بتقول نقعد نتغدا وناكل كلنا مع بعض وكانت عزومة كبيرة جداً للكرو كله، وكان ليها أثر كبير إننا نقدر نكمل".
واستكمل: "من الحاجات والاكتشافات في العمل كان جو الألفة والمرح، وكان رايحين بمنتهى التعب ولكن بقى بمنتهى الإصرار بعد ماسمعنا، إحنا كنا بنعرض وإحنا بنصور وطبعاً ردود الأفعال لما جت وعرفنا إن ناس كتير بدأت تتكلم عن المسلسل وإنه رقم واحد في المشاهدة على watch it والسوشيال ميديا كلها بتتكلم فأدى دفعة للكل إنه يعمله أحسن وكان عامل دفعة معنوية لكل كواليس المسلسل أول ماكنا نحس بإرهاق ردود الأفعال كانت بتخلينا نشتغل تاني بمنتهى القوة".
وأردف: "ده من أحلى الكواليس اللي اشتغلت فيها كمنتج وكمان استمتعت وأنا ممثل وأنا في وسط العيلة بتاعة برغم القانون وكواليس برغم القانون، والكل كان في ألفة شديدة ومحبة".