غادة طلعت لـ"وشوشة": السينما هي الأرشيف وشخصيتي في بنسيون دلال جريئة

تنتظر الفنانة غادة طلعت عرض أحدث أعمالها الفنية وهو فيلم "بنسيون دلال"، الذي من المقرر عرضه يوم 10 أكتوبر المقبل من الشهر الجاري.

وكشفت غادة طلعت في تصريح خاص لـ"وشوشة عن تفاصيل الشخصية التي تجسدها في الفيلم.

تحدث غادة طلعت عن دورها في الفيلم وعن تجربتها به قائلة: "فيلم بنسيون دلال تاني تجربة ليا في السينما، السينما الروائية الطويلة، عملت قبله فيلم لف وأرجع تاني هو إخراج أستاذ شادي علي وبطولة أحمد فتحي وآيتن عامر وطارق الإبياري وأستاذ محمد رضوان وكان فيلم كوميدي، وكان فيلم لطيف بالنسبالي ودي كانت أول تجربة".

وتابعت: "ودي تاني تجربة في بنسيون دلال وأنا مبسوطة جداً بيها، لإن الفيلم حاجة تجنن وبحب السينما وكلنا بنحب السينما والسينما هي الأرشيف، وبالنسبالي السينما أي دور فيها ببقى مبسوطة جداً ومبفكرش في مساحات لإن السينما في النهاية هي السينما، أرشيف للفنان".

وأوضحت: "بنسيون دلال تاني تجربة وهو إخراج أستاذ شادي الرملي، وأنا بقدم فيه دور ميمي هي شخصية جريئة جداً، وبالنسبالي عمري ما عملت شخصية بالجرأة دي وعكس الشخصيات اللي أنا قدمتها سواء في مسلسل الاختيار اوالمشوار أو الفتوة أو رحيم أو ستهم".

وأضافت: "الشخصية دي شخصية جريئة وخطر بالنسبالي بصراحة منطقة جديدة عمري ما لعبتها ولا اشتغلت فيها أو عملت أدوار بالشكل ده، فأنا متفائلة خير وربنا ييسر وتعجب الناس".

وأشارت: "هي شخصية اسمها ميمي بتدخل في علاقة مع عمر مصطفى متولي اللي هو بيقوم بدور رجب، وهو جوا بنسيون دلال".

واستكملت: "بنسيون دلال هو بنسيون فيه مندوب وبيعمل دوره أستاذ بيومي فؤاد وعمر مصطفى متولي وباقي الشباب أولاده، هما خمس أولاد بيملكوا الفندق ده وبتحصل كل الأحداث والصراعات داخل الفندق".

وأردفت: "أنا من ضمن الشخصيات اللي بتدخل الفندق المفروض هي في قصة حب مع عمر مصطفى متولي أو رجب، وهو واحد من الأخوات وبعد قصة الحب دي مابتتكشف داخل الفندق بتحصل أزمة كبيرة وصراع بين الأخوات وبداية الصراع بسبب ميمي، وهى بتشعل أزمة بين الخمس أخوات".

وعن تفاصيل الشخصية قالت: "وميمي بتدخل في صراع معاهم كلهم، وبتستخدم كل الأساليب في الصراع أو الخناقة، وهي المفروض برغم الشخصية اللي بتعملها لكن هي مثقفة وبتعرف تتكلم وبتقول أنا دارسة قانون ومعايا ثانوية عامة وحاجات كده، فهي شخصية فيها تناقضات مش سهلة ويارب تعجب الناس".

وأكدت: "وأنا مخضوضة منها لإنها جريئة بالنسبالي، أنا معملتش الأدوار دي قبل كده وإن شاء الله تعجب الناس، وأستاذ شادي الرملي المخرج هو شجعني لإني كنت قلقانة جداً من الدور فهو شجعني وقالي هنعمل كل حاجة في إطار كوميدي، وهو كان حريص عليا وكان حريص إني أكون موجودة في الفيلم، وبوجهله التحية ومبسوطة إن أنا معاه في أول تجاربه في الإخراج السينمائي كمخرج".

وعن ما جذبها للدور أوضحت: "اللي جذبني للدور إنه دور مختلف جداً وجريء جداً بالنسبالي ومكنتش أتخيل إني ممكن أعمل دور زي ده، بس تشجيع أستاذ شادي الرملي ده من ضمن العناصر اللي جذبتني للتجربة، الدور حلو بس أنا قلقانة من جرأته، بس أستاذ شادي شجعني وطمني إن إحنا هنعمله من غير مانضايق حد، فهو كان حريص إني أكون موجودة في التجربة".

ولفتت: "رشحني للدور أحمد تمام الكاستنج دايركتور، هو كلمني وقالي إن في فيلم اسمه بنسيون دلال وأستاذ شادي الرملي عايز يشوفني فروحت شوفته بناءً على ترشيح أحمد تمام وأنا بشكره جداً".

كما تحدث عن كواليس الفيلم قائلة: "كواليس الفيلم كانت لطيفة جداً وأستاذ شادي الرملي كان حريص إنه يعمل بروفات كتير، ومن أول تجربة مشوفتش كم البروفات دي في السينما أو حتى الدراما، البروفات بتاعة المسرح أنا متعودة عليها، لكن أستاذ شادي كان حريص إنه يعمل بروفات كتير على الدور وعلى أدوارنا كلنا".

وتابعت: "أنا كنت محظوظة إني بعمل بروفات كتير على الشخصية، واستفادت طبعاً من البروفات دي إنها خليتنا كلنا قريبين لبعض، والكواليس كانت لطيفة جداً".

كما كشفت عن تفاصيل وقالت: "قصة الفيلم بتدور حوالين بنسيون بيملكه خمس أخوات، كل واحد عنده طريقة تفكير بتختلف عن التاني خالص ففي صراعات بتحصل جوا الفندق بين الأخوات، والصراعات دي بتظهر مبادىء كل شخص وطريقة تفكيره وازاي في ناس بتغير مبادئها وازاي في ناس بتبقى مدعية بعض الشيء، وده حصل في خناقة ميمي اللي عملتها في أول أحداث الفيلم هي اكتشفت ادعاء بعض الناس اللي موجودين في البنسيون".

وأضافت: "وأنا شايفة إن شخصية ميمي شخصية مهمة جداً لإنها كشفت حقيقة كل الأخوات، وكل أخ ظهر كل اللي جواه بسبب الأزمة اللي هي عملتها بينهم".