نور محمود: الجيل الحالي صعب التحكم فيه.. وهكذا أتعامل مع أبنائي
تحدث الفنان نور محمود عن أحدث أعماله الدرامية الذي يحمل اسم "تيتا زوزو"، وكاشفًا رأيه في تحكمات الأهالي في قرارات أولادهم وكيفية التعامل معهم.
وأوضح “محمود” رأيه في شخصية سيف التي يؤديها قائلاً: "سيف عنده إيجابيات ومفيش شخصية من غير إيجابيات، فأنا حابب الإيجابيات اللي عنده تكون عندي، إن هو شخص شاطر جداً في شغله ودؤوب ومجتهد جداً ومميز كمان، وغير إنه بيحب عيلته جداً",.
وأضاف: "صحيح تناول موضوع الحب ده بشكل مختلف وده اللي باين في المسلسل، لكن أنا أحب أكون زيه في حبه لعيلته وحبه لشغله".
وتابع عن فكرة تحكم الأهل التي يناقشها المسلسل: "الموضوع دلوقتي مختلف، مبقاش ينفع حكاية التحكمات دي، مينفعش إن إحنا نربي ولادنا زي ما إحنا اتربينا زمان، ولازم نعرف إن الجيل ده مختلف، الجيل ده شايف الدنيا من منظور أوسع بكتير جداً مننا، وبص على الدنيا بشكل أكبر بكتير جداً مننا، فلازم نفهم ده كويس ونعرف إن إحنا قدام جيل مش شباكه الأب والأم بس وبقى في إيده تليفون بيعرف يبص على العالم كله منه، ومن هنا لازم نبدأ نتعامل ونفهم الجيل ده بيفكر إزاي، ونبدأ نتعامل على الأساس ده".
كما كشف نور محمود عن رد فعله إذا أصبح في موقف سيف، قائلاً: "أنا لو مكان سيف وولادي قالولي مش هنكمل تعليم، أنا الموضوع بالنسبالي إن سيف اتعامل مع الموضوع من الأول بشكل غلط، لإن من الأول خالص هو بيتحكم إن هو يعمل اللي حسب فكره وإن هو ده الصح بغض النظر ولاده بيحبوا ايه أو مبيحبوش ايه".
واستكمل: "أنا بتعامل مع ولادي من الأول هما بيحبوا ايه ومبيحبوش ايه ونفسك تدخل كلية ايه، فاللي هو ميال ليه وبيحبه هو ده اللي رايح ناحيته فمش هيجي وقت من الأوقات أنا مش عايز أكمل لإن هو بالفعل في حاجة بيحبها أو حاجة هو اللي مختارها".