نور محمود لـ"وشوشة": وجود إسعاد يونس سبب حماسي لـ "تيتا زوزو"
تألق الفنان نور محمود في أحدث أعماله الدرامية الذي يحمل اسم "تيتا زوزو"، وتحدث نور محمود في تصريح خاص لـ موقع “وشوشة” عن سبب تحمسه لقبول شخصية سيف وعن كواليس المسلسل.
وقال نور محمود عن سبب تحمسه للشخصية: "اللي خلاني متحمس لدور سيف وللمسلسل عموماً، أول حاجة وهي مهمة جداً أستاذة إسعاد يونس نفسها، إحنا بنتكلم في مسلسل بطولة العظيمة أستاذة إسعاد يونس وده بسم الله الرحمن الرحيم أنا موافق، وبعد كده الورق حلو أوي تأليف محمد عبد العزيز، كاتب سيف بشكل مختلف وكاتب الشخصية بشكل مختلف وكاتب الشخصيات كلها بشكل مختلف، فالمسلسل حلو أوي والورق بتاعه حلو أوي وإخراج الجميلة الرائعة أستاذة شيرين عادل، فهناك عوامل كثيرة زادت من حماسي لدور سيف".
وأضاف: "كواليس المسلسل طبعاً تجنن فيها أستاذة إسعاد يونس والأستاذة شيرين كانوا عاملين حالة من الحب والود بشكل مرعبة، وكنا بنستنى اليوم التاني إن إحنا نيجي نصور".
وتابع: "فالكواليس حلوة أوي، أستاذة إسعاد كانت محتويانا بشكل رهيب لدرجة إن إحنا خلاص بنيجي من برا بنقوم مخبطين على باب الأوضة عندها عشان نقعد وناكل ونتكلم، فإحنا ولادها بجد وهي بتتعامل معانا على الأساس ده فكانت الكواليس ممتعة".
واستكمل: "انطباعي وإحساسي عن شخصية سيف هي شخصية مختلفة وكاركتر مختلف عن اللي عملته قبل كده وعن اللي قدمته قبل كده، فدي حاجة حمستني إن أدخل أشتغل فيه".
وأردف: "شخصية فيها تفاصيل كتيرة أوي فاشتغلت على التفاصيل دي أنا وأستاذة شيرين وأستاذ محمد عبد العزيز المؤلف ومع الأساتذة طبعاً اللي أنا بشتغل معاهم".
واختتم: "فإحساسي بيها إني في تحدي جديد بشخصية مختلفة، اتمنى أكون يارب عند حسن ظن الناس".