في ذكري وفاة والده .. هاني حسن الأسمر لـ وشوشة:' مكنش بيضايق المعجبين وبيتصور عادى

يحل اليوم الأربعاء 7 أغسطس ذكرى وفاة واحد من أشهر مطربي الفن الشعبي في مصر، الفنان الراحل حسن الأسمر، والذى يعد واحداً من أبرز صناع  الأغنية الشعبية.

تواصل موقع “وشوشة” مع نجله الفنان هاني حسن الأسمر ليتحدث عنه في ذكرى وفاته كاشفا العديد من الأسرار حول والده، وعلاقته بيه ودخوله مجال الغناء رغم معارضته في البداية.

كشف الفنان هاني حسن الأسمر أن والده كان يحب جميع أغانيه ولم يندم على أي أغنية قام بغنائها مضيفا:كان بيختار الأغاني بعناية وكان بالنسباله أغانيه دي زي أولاده بالظبط، علشان كده مكنش بيندم على أي حاجه بيعملها.

علاقته بالمعجبين 

أضاف قائلا:' كان بيهتم برأي الناس وبيتابع وبيشوف الناس حبت إيه ومحبتش إيه ولما كان بيعمل ألبوم كان بيشوف إيه الأغاني اللي اتسمعت وإيه اللي متسمعتش، وكان بيحب كل مطربين جيله وكان على علاقة طيبة بيهم وهما كانوا بيحبوه.

كما تحدث هاني حسن الأسمر عن علاقه والده بالمعجبين في الأفراح والمناسبات العامة :' كان بيتصور مع كل الناس في الشارع مكنش فيه موبايلات زمان بس مكنش بيقول لحد عايز يتصور لا  ولما كان حد يقول ممنوع كان يزعقله ويقوله لا هيتصور وياخده ويحضنه ويتصور.

كما كشف عن بداية اكتشاف والده لموهبته في الغناء :' كنا في حفلة عيد ميلاد وغنيت وانا صغير وهو اتفاجأ لكن بعد كدا دخلت معهد الموسيقى وقولتله في إني عايز أدخل المجال لكنه كان معارض في الأول واتحايلت عليه لحد ما عملنا أغنية " صياد" ودي الأغنية الوحيدة اللي عملتها معاه.

التفكير في المنافسة من عدمها وتلحنيه لأغانيه

تابع :' اي أب مبيحبش يشوف ولاده تعبانين وهو كان شايف إن المهنة دي متعبة وفيها مجهود، فكان رافض للسبب ده، لكن كنت باخد منه نصائح دايما وكنت بشوفه بيقعد ازاي مع أي ملحن أو مؤلف وبتعلم منه

تحدث هاني الأسمر عن تفكير والده في المنافسة قائلا :' والدي لم يكن يفكر في المنافسة مطلقا، لأنه كان ملحن بالأساس وكان يؤمن أن كل شخص لديه رزقه، وكان يقوم بالتلحين لنفسه دون أن يكتب اسم الشهرة " حسن الأسمر" على الألبوم كان دائما يكتب حسن عبد العزيز خوفا من انتقاد الجمهور له، كونه مطرب وملحن في نفس الوقت، لكن في ذات الوقت كان يرفض إعطاء لحن لأي مطرب خوفا من فشلها فيتهمه المطرب أو الجمهور أنه سبب فشل. 

وعن تشبيه الجمهور له بوالده في الشكل والصوت قال هاني الأسمر:' كنت بيضايقني زمان إن الناس قالت عليا بقلده لحد ما جننوني، وكنت بقول والله ده صوتي هقلده إزاي، لكن طول عمري كنت مبسوط اني شبهوا في الشكل والصوت، هو حد يزعل إنه يكون شبه أبوه.

كما أعلن عن تحضيره لأعمال جديدة  منها أغاني سنجل ستطرح الفترة القادمة.