أسامة منير: اجري عشان حلمك.. لو فضلت تتفرج مش هتوصل!
وجّه الإعلامي أسامة منير حديثاً صريحاً إلى جمهوره، مؤكدًا أن النجاح يبدأ باتخاذ الخطوة الأولى وعدم الاكتفاء بمراقبة الآخرين وهم يحققون إنجازاتهم.
وقال أسامة منير، خلال فيديو نشره على صفحته الشخصية على إنستغرام: "الناس نوعين: نوع بياخد خطوات وبيجري لقدام، ونوع واقف يتفرج على اللي بياخد الخطوة".
وأضاف: "ناس بتجتهد وبتغامر وبتاخد خطوات وبتسبق، وناس قاعدة بتتمنى وتقول يا سلام، شوفوا فلان عمل إيه، وشوفوا علان كسب إيه، وشوفوا إيلون ماسك عمل إيه طب ما تعمل! طب ما تاخد خطوة أنت كمان!".
وشدد أسامة منير المعروف بأسلوبه القريب من الناس على أهمية الجرأة في مواجهة مخاوف الفشل، قائلاً: "خايف تجري؟ عمرك ما هتاخد خطوة في حياتك، اتشجع وانزل اجري على فكرة، كل ما تسعى ربنا بيفتحلك الأبواب، ابتدي بس خد أول خطوة وهتلاقي الخطاوي اتجرجرت بعضها".
واختتم رسالته مؤكداً أن التمني وحده لا يصنع النجاح: "إنما تقعد تتحسر وتبص على اللي بيجري وتبص على اللي بينجح، مش هتعمل حاجة في حياتك".