نور إيهاب لـ"وشوشة": شخصيتي في "6 شهور" مختلفة جداً
تشارك الفنانة الشابة نور إيهاب في بطولة مسلسل "6 شهور" مع الفنان نور النبوي والمخرج مصطفى سولي.
وكشفت نور إيهاب في تصريح خاص لـ"وشوشة" عن تفاصيل دورها بمسلسل 6 شهور قائلة: "مسلسل مهم جداً بالنسبالي وإن شاء الله هيكون حاجة مختلفة عن الفترة اللي فاتت .. وبالنسبالي شخصية "لطيفة" شخصية بنوتة لذيذة بتحب الحياة وهنعرف القصة وتفاصيلها لما نتفرج على أحداث المسلسل".
أما عن ترشحها للدور قالت الفنانة نور إيهاب : "رشحني للدور شركة "أروما" للإنتاج الفني وده مش أول عمل ليا معاهم و سبق وشاركت معاهم في مسلسل "إلا أنا" ومسلسلات أخرى، هم كلموني وقريت الدور وعجبني جداً".
وتحدثت نور إيهاب عن سبب قبولها للدور قائلة: "لقيت الدور مختلف جداً محدش اتكلم قبل كده عن الأشخاص اللي بيشتغلوا في مجال العقارات".
وتابعت: "فئة كبيرة و أشخاص كتيرة جداً بيشتغلوا في مجال العقارات و هيشوفوا من خلال المسلسل مواقف كتيرة جداً بنحكيها عن الوظيفة دي وعن حياتهم ومواقف بتقابلهم كثير إحنا بنحكيها في المسلسل .. ودي من أكثر الحاجات اللي شدتني للمسلسل إنه هيتكلم عن شيء مقترن بالعاملين في مجال العقارات جداً".
أما عن سبب انجذابها إلى هذه الشخصية قالت: "شدني للشخصية إن تركيبتها متعددة و ليها جوانب مختلفة هي تبان بسيطة جداً و إن الشخصية شبهي في أكثر من حاجة".
و أضافت: "لكن في نفس الوقت من القصة بتاعتها ومن باقي أحداث المسلسل هنكتشف إن لسه فيها تفاصيل أكتر عن اللي ظاهرة وتفاصيل جديدة عن شخصيتي".
وتحدثت نور إيهاب عن مشاركتها مع الفنان نور النبوي بالمسلسل قائلة: "مسلسل 6 شهور يعتبر ثاني تعامل بيني وبين نور النبوي ومن أحلى الحاجات اللي اشتغلناها".
وكشفت الفنانة نور إيهاب عن كواليس المسلسل معبرة عن سعادتها قائلة: "الكواليس كانت حلوة جداً إحنا كنا بنصور وقت كبير لكن استمتعنا بالتصوير جداً".
وتابعت: "كل الممثلين اللي شاركوا في المسلسل كانوا بيعملوا أدوار لايت كوميدي ولذيذة فاستمتعنا جداً بالعمل معاهم.
وأضافت: "استمتعنا أيضًا بالعمل مع المخرج مصطفى سولي، هتشوفوا إخراج حلو جداً بالمسلسل وكلنا كنا مهتمين بكل تفصيلة في المسلسل وتعبنا عليه جداً وإن شاء الله يعجب كل المشاهدين".