"خلي عندك ثقة في الله وحبي نفسك".. داليا مصطفى تدعم محاربي السرطان في "بهية"
قدّمت مؤسسة بهية لعلاج سرطان الثدي هدايا أيقونية من الذهب للمحاربات في حدثٍ توعوي أقيم في مقر المؤسسة بحضورٍ لافت للفنانة داليا مصطفى في خطوةٍ تندرج في سياق حملة شهر أكتوبر الوردي لمكافحة سرطان الثدي.
و دعمت الفنانة داليا مصطفى محاربي مرضى السرطان من خلال تواجدها في بهية قائلة: "الحب من أهم الحاجات اللي بترفع الطاقة الإيجابية عندنا، إحنا لو حبينا نفسنا أولا، وبقينا فخورين بنفسنا مهما كان عندنا من مشاكل أو أمراض ربنا بيعديها، ولما يكون عندنا ثقة جامدة في ربنا وفي نفسنا الموضوع هيعدي" .
وأضافت: "ولما تحبي نفسك هتلاقي شئ إلهي بتحبي الناس وبتقابليهم بطريقة لطيفة، أنا كان زمان عندي مشكلة وأنا سايقة ببقي متعصبة دلوقتي لو لاقيت حد متعصب ببتسمله وبهدي الموقف، فالضحكة في وش أخيك صدقة، ولما تتضحكوا في وش بعض الروح دي هتطغى علينا".
وتابعت : "إحساسي إني بساعد الناس ولو بكلمة أو بضحكة بقيت حاجة بتبسطني، وبترفع من نفسيتي، و ده أثر علي شغلي بشكل أفضل، وحياتي بقيت أحسن وبقي ليا أصدقاء أكتر، لما بترفع طاقتك بالشكل ده، وتحس بقيمتك أوعى تزعل علي الدايرة اللي حواليك أنها بعدت، لأن غالبا الدايرة اللي حواليك بتكون مش أحسن حاجة، ولما بيبعدوا بتلاقي حواليك ناس مؤمنة بيك بجد".
واختتمت الفنانة داليا حديثها: "خليكوا دايما في حالة من النشوة والامتنان والفرحة والسعادة".
