عمرو مصطفى لـ"وشوشة": في ناس بتزور النجاح وتشتري ناس تشكر في أغانيهم بـ 500 دولار

حل الملحن عمرو مصطفى، ضيفًا في ندوة فنّية بموقع "وشوشة"، بحضور رئيس التحرير الكاتب الصحفى عمرو صحصاح، وتحدث عن معايير نجاح الأعمال الفنية بالنسبة له.

وقال عمرو مصطفى خلال ندوته في "وشوشة": "النجاح عندي في الشارع وبس، لكن أنا ممكن أشتري ب 500 دولار أكتر من حد يعمل تعليقات ويقعد يقولي الله إي الجمال دة أنت عالمي.

وأضاف: "الناجح بتسقفله ومبيستخبيش النجاح، اللي بيحصل إن في ناس بتزق ناس تقول عليا كلام وحش، وبعدين أظهر إني وحش وبتاع مشاكل قدام الناس.

وسبق وكشف عمرو مصطفى، عن نيته لإعادة تقديم أعماله بصوته مرة أخرى بعد انتهاء حقوق ملكيتها، حيث كتب عبر حسابه بموقع فيسبوك تفاصيل قراره.

وقال: الأغاني اللي عملتها هترجع تاني بصوتي بعد انتهاء مدة حقوقها، فيه أغاني عملتها من سنة 1999، يعني فاضل حوالي عشرين سنة وترجع الحقوق تاني ليا.

وأضاف: ووصيتي لأولادي عدم التجديد لأي شخص، هنبتدي ننزلها من دلوقتي بصوتي، لكن بالكلام متغير وتوزيع جديد تمامًا، الأغاني دي هتفضل موجودة بصوتي طول العمر، وأي نسخة بصوت أي مطرب غناها قبل كده هتتمسح تمامًا بعد انتهاء المدة القانونية لها.

وأردف عمرو مصطفى خلال منشوره: هنفتح المجال للشباب الجديد إنهم يكتبوا على الألحان دي كلمات جديدة، خلال الخمس أو ست سنين الجايين.

واختتم: هكون محضر كل الأغاني اللي عملتها بصوتي مع كتابات شبابية جديدة، ونصيحة للمبدعين أي تصريح لا يزيد عن خمس سنوات.