عمرو مصطفى لـ"وشوشة": فى مطرب الشعب كان بيستناه يكح عشان يسمعوه دلوقت نزل 3 أغاني معرفش أساميهم
حل الملحن عمرو مصطفى، ضيفًا في ندوة فنّية بموقع "وشوشة"، بحضور رئيس التحرير الكاتب الصحفى عمرو صحصاح، وأكد أنه ورقة الحظ لكل فنان يتعاون معه.
وقال عمرو مصطفى خلال ندوته في "وشوشة": أنا نهيت ال25 سنة بتوعي بالوسط الفني، ودلوقت عاوز شعراء ومطربين جداد، كله هيكون جيل جديد.
وأضاف عمرو مصطفى: "الناجح هسقفله وأي حد عمل حاجة حلوة من اللي هما مش زمايلي هقول إنها حلوة، ألبوم أنغام جميل وتحفة، وأغاني شيرين حلوة.
وتابع: قدمي حلو على كل المطربين اللي اشتغلت معاهم، يوري مرقدي عملتله أغنية اسمها بحبك موت بعدها كسر الدنيا ومضى فيلمين، وفي ناس تانية قدمها معروف، مثلا مطرب كان جامد ومعروف وفجأة الناس بتتريق عليه.
واستطرد: في ناس خدوا المطربين اللي كانوا معايا نجوم ووقعوا معاهم، واحد كان الشعب بيستناه يكح عشان يسمعه ومنزل 3 اغاني دلوقت انا معرفش أساميهم.
وسبق فاجأ الفنان عمرو مصطفى، متابعيه بالإعلان عن تسجيله للقرآن الكريم بصوته، كصدقة جارية له، إلى جانب إعادة تقديمه جميع الأعمال التي قدمها منذ عام 1999 بصوته بعد انتهاء مدة حقوق ملكيتها.
عمرو مصطفى، قال إنه يسجل القرآن الكريم بصوته خلال الوقت الحالي، وذلك ردًا على أحد متابعيه والذي طالبه بتسجيل القرآن بصوته كصدقة جارية، قائلا: بسجله الآن الحمدلله.
وسبق وكشف عمرو مصطفى، عن نيته لإعادة تقديم أعماله بصوته مرة أخرى بعد انتهاء حقوق ملكيتها، حيث كتب عبر حسابه بموقع فيسبوك تفاصيل قراره.
وقال: الأغاني اللي عملتها هترجع تاني بصوتي بعد انتهاء مدة حقوقها، فيه أغاني عملتها من سنة 1999، يعني فاضل حوالي عشرين سنة وترجع الحقوق تاني ليا.
وأضاف: ووصيتي لأولادي عدم التجديد لأي شخص، هنبتدي ننزلها من دلوقتي بصوتي، لكن بالكلام متغير وتوزيع جديد تمامًا، الأغاني دي هتفضل موجودة بصوتي طول العمر، وأي نسخة بصوت أي مطرب غناها قبل كده هتتمسح تمامًا بعد انتهاء المدة القانونية لها.
وأردف عمرو مصطفى خلال منشوره: هنفتح المجال للشباب الجديد إنهم يكتبوا على الألحان دي كلمات جديدة، خلال الخمس أو ست سنين الجايين.
واختتم: هكون محضر كل الأغاني اللي عملتها بصوتي مع كتابات شبابية جديدة، ونصيحة للمبدعين أي تصريح لا يزيد عن خمس سنوات.
