إيناس الدغيدي: سعاد حسني انتحرت عشان حست إنها مبقتش نجمة وشكلها اتغير

أثارت المخرجة إيناس الدغيدي حالة من الجدل بتصريحاتها بعد حلولها ضيفة على برنامج القرار المذاع على قناة الغد، وتحدثت بجرأة مؤكدة أنها عاشت المساكنة مع زوجها قبل الزواج وانتحار السندريلا سعاد حسني.

وعن السؤال المثير للجدل حول ما إذا كانت سعاد حسني انتحرت أم قتلت قالت: "سعاد حسني انتحرت، أنا أعرف سعاد حسني كويس جدًا وأنا ضد مقولة تقتل لأن لا يمكن حد يقدر يقتلها لأن هي كانت شخصية جميلة من جوه، وتبقي متغاظة منها وهتتجنني لأنها تأخرت وتيجي كأنها معملتش حاجة.

وأضافت: سعاد حسني من كتر الضغط في الفن كانت بتاخد مهدئات من وهي عندها 44 سنة، ومتذكرة كويس أوي فيلم حب في الزنزانة أنا كنت مساعد مخرج فيه وكانت سعاد على طول بتاخد مهدئات عشان مش عاوزة تسمع اللي بيحصل ولا المشاكل، وحتى لما بيكون في كارثة بينها وبين مخرج تدخل تاخد حباية، وبقولها لكل الناس المهدئات دي في الاخر بتوديكي للانتحار".

وتابعت: "سعاد حسني انتحرت لأن العمر ده كله كانت بتاخد مهدئات، وهي نجمة كبيرة وليها جمهورها، لما شافت نفسها أنها مابقتش نجمة وأن شكلها اتغير والمرض عمل فيها كده عشان كده انتحرت، لكن قصة قتل سعاد حسني أنا ضدها على طول الخط، واحنا كنا دايمًا بنقول في اتنين هينتحروا في السينما سعاد حسني وأحمد زكي ليه لأن هما فنانين أوي ومابيخططوش لأي حاجة في الدنيا ومزاجيين جدًا، وأحمد زكي الوقت مأسعفوش ومرض ومات، لكن سعاد حسني النبوءة تحققت".

وأردفت إيناس الدغيدي خلال اللقاء: مختارتش أكون جريئة، أنا فعلا جريئة وحياتي كلها فيها جرأة وأنا مكنتش متخيلة إني جريئة، وبتصرف عادي ولكني طلعت جريئة، ولما دخلت الفن ومعهد السينما كان بالنسبة لي لحظة جرأة لأننا من عيلة ملهاش علاقة بالفن، وعيلة ملتزمة دينيًا ووالدي كان مدرس لغة عربية ودين.

وأكدت إيناس الدغيدي أنها لم تفكر في الحرام طيلة حياتها موضحة: مفكرتش في الحرام كتير، ومش حطاه التارجت بتاع حياتي، لأني لو فكرت وقلت حرام حرام، مكنتش عملت أي حاجة في حياتي.

وتابعت: الناس شايفني عملت الحرام أكبر بكتير من اللي أنا عملته لأن أفكاري وجرأتي أدت انطباع غير شخصيتي الطبيعية خالص، لكن أنا مش بشرب خمرة ولا سجاير وعلاقاتي مظبوطة ومناسبني سنًا وعقلًا ومش بعمل علاقة من تحت الترابيزة.

وأردفت: وممكن أدخل علاقة الناس تشوفها حرام لكن أنا بشوفها عادية طالما فيها صدق وحب واهتمام، وما بحاسبش روحي بالحلال والحرام، وأفكاري الجريئة ظلمتني زمان وقدرتني النهارده لأن اللي بيتعمل أكتر بكتير من اللي قلته.

وكشفت تفاصيل تجربتها مع المساكنة قائلة: عمري ما اتجوزت عرفي، لكني عشت المساكنة مع جوزي قبل ما أتجوزه أكيد، لأني قعدت تسع سنين بحبه، ومش فاكرة المساكنة كانت كام سنة بالظبط.