داليا مصطفى: مجبتش مجموع في الثانوية العامة وحالي دلوقت أحسن من صحابي المهندسين

أكدت الفنانة داليا مصطفى، أن مجموع الثانوية العامة، ليس مقياسا للحياة، مشيرة إلى أنها تعتبر مثالا لمن لم يحالفه الحظ ويحصل على مجموع جيد.

وقالت داليا مصطفى خلال تصريحات تليفزيونية: أنا قصتي تكتب ومثال للي مجابش مجموع كويس.. أنا كنت شاطرة جدا وكان متوقع لي هندسة.

وأضافت: حبيت فلما حبيت عكيت في الثانوية العامة ومجبتش مجموع رغم أني كنت بطلع من الأوائل جبت مجموع سيء تقريبا 60%.. واتحايلت على أمي أني أعيد السنة ولكنها رفضت لأن شخصيتها قوية.

وتابعت موضحة: والدتي سحبت ورق تمثيل بالغلط بدل ورق ديكور.. وبقيت أصرخ وأقول أنا مبعرفش أمثل وقعدت أعيط.

وأشارت داليا مصطفى إلى أنها رسبت في أول سنة، موضحة: أول سنة ما قبلونيش وأنا نازلة قابلت جلال الشرقاوي وقال لي تعالي على المسرح.

وأردفت: واداني دور في دستور يا أسيادنا والدنيا اتفتحت بعدها.. من وأنا في المسرح قبل ما أدخل المعهد ودخلت بطولات عمري ما كنت أتوقعها وأثبت وجودي في حتة مكانتش في بالي.

واختتمت: ربنا دايما بيوفق للأحسن ولو حد جاب مجموع صغير تأكد أن ربنا كاتب لك حاجة أفضل.. وأنا سعيدة ولقيت نفسي دلوقتي ووارد تكون نفسك في حاجة وربنا شايف لك الأفضل، وزملائي كانوا شاطرين جدًا وفي منهم مهندسين بس بقوا موظفين ومبقاش بينا نقطة تلاقي ومبنعرفش نتكلم وأنا حالتي أحسن منهم بكتير.