كنت هشتغل عنده في البوفيه.. عمر كمال يكشف عن تخلي محمد فؤاد عنه
تحدث مطرب المهرجانات عمر كمال، عن تخلي المطرب محمد فؤاد، عنه، وتحدث عن تقدير موقفه في الوقت، وذلك خلال حلقته في بودكاست "فايق ورايق" للإعلامي إبراهيم فايق.
وأكد عمر كمال أنه طلب مساعدته لدخول مجال الغناء قائلا: "أنا واحد كانت غايته في الحياة إنه يقابل محمد فؤاد، ويقدم لي الدعم، حتى لو هشتغل عنده في البوفيه، وأتعلم منه أي حاجة".
وتابع كمال: "كنت بروح كل يوم عند بيته ومبيجيش، وبعدين لما جه رمضان، لقيت واحد طالع يمسح العربية، عرفت إن محمد فؤاد جاي، فرحتله وقلتله أنا بعشقك وبحبك وبشتري الشريط الأصلي بتاعك مش المضروب، وبقعد في أول صف في حفلاتك في دريم بارك.. قالي ربنا يخليك يا عمورة تسلم يا حبيبي».
وأضاف: "قلتله صوتي حلو ونفسي تسمعني، قالي سمعني، فغنيتله أغنية يا قلبي خبي لـ عبد الحليم حافظ، قاللي جدع، صوتك حلو وييجي منه، يلا ربنا يوفقك، ونادى على ولد يطلعله العربية.. قلتله يا أستاذ أنا جايلك عشان تديني كتف، قاللي يا عمر روح قدم، في برامج أصوات كتير دلوقتي، لكن أنا مش بقدم حد".
وأوضح عمر كمال، أنه قدر موقف المطرب محمد فؤاد بعد دخوله الوسط الفني، قائلًا: "هو برضه كان عنده حق.. دلوقتي بيحصلي نفس الموقف وبقول نفس الرد، وبقولهم أعمل أغنية ونزلها على التيك توك هتنتشر وأعمل محتوى كويس".