عمرو سلامة عن "برستيج": تجميعة مستحيل تلاقيها في أي مكان بالعالم
تحدث المخرج عمرو سلامة عن أجواء تصوير مسلسل "برستيج"، كاشفًا عن كواليس إنسانية وفنية فريدة جعلت من التجربة مختلفة ومميزة عن أي عمل سابق له.
وقال عمرو سلامة خلال حديثه مع قناة "المشهد لايت": "وأنا قاعد في التصوير وسط طاقم العمل، كنت كل شوية أبص حوليّ وأقول لنفسي إن التجميعة دي مستحيل كانت تحصل في أي مكان تاني في الدنيا، حتى بشخصياتهم الحقيقية، الناس دي مكنتش هتتقابل غير هنا، بالشخصيات اللي بيجسدوها، في اللحظة دي تحديدًا".
وأوضح أن تلك التركيبة غير المتوقعة خلقت نوعًا من العلاقات الغريبة داخل كواليس المسلسل، وأضاف: "التجميعة دي كانت جميلة جدًا، بس صعوبتها إنك لازم تجمع كل الممثلين كل يوم، ومينفعش حد يعتذر، لأنك ببساطة مش هتعرف تصور من غيره، وجودهم كلهم في لوكيشن واحد كان تحدي لوجستي كبير".
ورغم تلك التحديات، يرى عمرو سلامة أن هذه الصعوبة تحولت إلى عنصر إبداعي قائلا: "الميزة في دة إنه طلع شخصيات بشرية مختلفة تمامًا، وطريقة تعاملهم مع بعض كانت بتطلع مفارقات إنسانية وفنية كتير قوي، ودة انعكس على روح العمل بشكل واضح".