إسماعيل فرغلي: كنت طبيعي في "مكتوب عليا" والناس صدقتني
تحدث الفنان إسماعيل فرغلي عن كواليس مشاركته في مسلسل "مكتوب عليا" مع الفنان أكرم حسني، مؤكدًا أن نجاحه في الدور جاء من تلقائيته وعدم تصنّعه، وقال: "أنا دايمًا مقتنع إنك متمثلش عشان تمثل.. كل ما تكون طبيعي أكتر، الناس تصدقك أكتر".
وأضاف إسماعيل فرغلي، خلال استضافته عبر بودكاست "فايق ورايق"، أن السر وراء تميّزه في الدور يعود لتحضيره الجيد، إلى جانب توفر عناصر نجاح متكاملة في العمل، موضحًا: "أنا كنت بذاكر الدور كويس، ومعايا ورق حلو من أول الفكرة، ومعايا مخرج فاهم يعني إيه ضحك"، لكنه في الوقت نفسه أشار إلى أنه لم يدخل الشخصية بأسلوب التقمّص، قائلاً: "أنا ممثلتش ومتقمصتش.. والدور ده كنت فيه مكان حد تاني، ومكنتش محضّر والله، يمكن لو كنت جهّزت كان طلع بايخ".
وأشار إلى أن الخبرة وكواليس التصوير تلعب دورًا كبيرًا في الأداء، خاصةً في أجواء العمل الجماعي، وأضاف: "الخبرة بتفرق، والكواليس بتساعد.. إزاي هطلع أمثّل قدام حد وأنا مخنوق منه؟! الجو العام له تأثير كبير".
وفي ختام حديثه، أشاد إسماعيل فرغلي بزميله أكرم حسني، واصفًا إياه بـ"الحالة الحلوة"، وقال: "أكرم كواليسه كويسة جدًا، وحياته كويسة، وده بينعكس على كل اللي حواليه في الشغل".