ياسمين علي لـ "وشوشة": "أول مرة اتحرم من صوتي"

كشفت المطربة ياسمين علي في تصريح خاص لموقع "وشوشة" عن أسوأ المواقف التي تعرضت لها خلال مسيرتها الغنائية قائلة: "أنا في يوم قومت من النوم ملقتش صوتي، إيه اللي حصل معرفش صوتى مش موجود، مش عارفة اتكلم بشاور بس والمفروض عندي حفلة الأسبوع الجاي في البحرين، و عندي تسجيل تتر آخر الأسبوع لمسلسل الضاحك الباكي بتاع نجيب الريحاني".

وأستكملت: "أنا طبعا عمالة أعيط أنا أول مرة اتحرم من صوتي مش عارفه اتكلم مش عارفة أغني، لقيت مهندس الصوت والملحن بتاع التتر جابولي مشروب فلقيت صوتي بيرجع الحمد لله و كأنه سحر بس صوتي كان مبحوح شوية بس قلت ماشى الحمد لله أصل صوتى يروح دي بالنسبالي عاملة زى الأيد والرجل والعين محدش يقدر يستغنى عنهم".

وأضافت: "سجلنا التتر وطلع بالشكل اللي اتسمع بيه، بس أنا مكنتش راضية عنه طبعا لأن أنا عارفة أن أنا صوتي مش سليم وسافرت لمهرجان في البحرين وأنا عارفة إن صوتى لسة مش سليم، وفي بداية الحفلة قلتلهم أنا صوتي رايح سامحوني صحيح سامعني بس ده مش صوتي الحقيقي فأعذروني لو حصل أي خطأ أنا جاية علشانكم فلقيت منهم استحسان رهيب وأول ما سمعت صوت التسقيف صوتي رجع".

وتابعت معبرة عن عشقها للغناء وللطرب الأصيل قائلة: "الغناء ده في دمي أنا مولودة بغني، بعشق فيروز وأم كلثوم، أسمهان، فريد الأطرش، سيد درويش، دول اللي  بنوا الفن صح الفترة بتاعتهم دي فترة ماسية ومن الجيل الموجود قازم الساهر، شيرين عبد الوهاب، بأقعد أتفرج عليهم وأسمعهم وأتعلم، دول قدوة ومثل أعلى بالنسبالي".

وفسرت سبب نجاح كوكب الشرق أم كلثوم وغيرها من العظماء قائلة: "أم كلثوم وأسمهان وفيروز الناس دي لما طلعت كان حواليها شعراء وملحنين كانوا ماسكينهم و بيوجهوهم صح ومبيبخلوش عليهم بمعلومة، يعني حد زى أم كلثوم كان حواليها طول الوقت أحمد رامي وزكريا أحمد، القصابجي، أول ما لقوا إن في موهبة زي دي قالوا لأ، دي متبقاش كده ومسابوهاش مش متعلمة ثقفوها خلوها تتعلم، أما الزمن اللي إحنا موجودين فيه ده مفيهوش كده أنا بواجه زمن أنا فيه لوحدي".

الجدير بالذكر أن ياسمين علي واحدة من أهم الوجوه الصاعدة في مجال الغناء ولها العديد من الأعمال الناجحة التي لاقت نجاح واستحسان منقطع النظير في مصر والعالم العربي ومن أهمهم أغنية الأصول العربية، ما ضاقت إلا أما فرجت، كتب التاريخ، زي الموج، أنا ليا أب.