هند صبري تكشف تفاصيل تعرضها للتنمر على يد زملائها بسبب التمثيل

كشفت الفنانة هند صبري، عن بداياتها الفنية، حيث أكدت أنها كانت لا ترغب في دخول مجال الفن من البداية، وأن المخرجة إيناس الدغيدي هي من رشحتها للعمل في مجال السينما.

وقالت هند صبري حلال ندوتها المقامة بمهرجان الجونة السينمائي: محظوظة إني اتحطيت في السينما وأنا صغيرة، وعمري ما كنت عايزة أبقى ممثلة، كنت عايزة أطلع سفيرة، وكنت دحيحة وشاطرة جدا في الدراسة، ولما جيت مصر بالصدفة اشتغلت سينما، لما قابلت إيناس الدغيدي.

وأضافت: بعد ما اشتغلت في أول فيلم قررت مشتغلش ثاني ممثلة، عشان اتوجعت لأني كنت متعودة أشوف كاست العمل كل يوم، وفجأة التصوير خلص ومبقتش أشوفهم، لحد ما المخرجة مفيدة رجعتلي تاني بعمل وأقنعتني أشتغل.

وتابعت: أهلي شجعوني وكانوا عايزيني أمثل، وأنا اللي مكنتش عايزة، لأن صحابي في المدرسة كانوا بيتريقوا عليا، وأنا مكنتش عايزة دا يحصل، ولما بشتغل مع فنانات شابات بفتكر الأيام دي.

يذكر أن آخر أعمالها في السينما كان فيلم فضل ونعمة، تأليف أيمن وتار وإخراج رامي إمام، وشاركها البطولة ماجد الكدواني، ودارت الأحداث في إطار اجتماعي كوميدي، وشارك فيه محمود حافظ، محمد رضوان، ياسمينا العبد، شريف دسوقي، طه دسوقي وغيرهم.