دانا حمدان لـ"وشوشة": سيكولوچية القاتل المتسلسل دايما بتبهرني وأحب أشتغل مع سامح سند
كشفت الفنانة دانا حمدان في تصريح خاص لـ"وشوشة" حول زوقها الفني ونوعية الأعمال التي تحرص علي متابعتها قائله "أنا من أكتر من عشر سنين وأنا عندي شغف أتابع جميع الأفلام والمسلسلات والوثائق اللي لها علاقة بالجرائم و التحقيقات سواء قصص حقيقية أو غير حقيقية".
تابعت: "أنا شخص بطبيعتي بحب أفك الألغاز في الحقيقة، مثلا لو فى عقد اتكلكع مبسيبوش غير لما أفكه وعندي قوة ملاحظة حادة جدا فبتشد للأعمال اللي فيها تحقيق لفك اللغز وإزاي بيوصلوا للحقيقة في الأخر".
وأضافت دانا قائلة: "كمان درست حقوق لمدة سنة فسبحان الله تلاقي شخصيتي كلها فيها جزء من ده أعتقد كنت هبقى محققة ومحامية قوية".
واستكملت: "بيشدني السيكولوچية بتاع الأشخاص اللي بيقوموا بالجرائم خاصة القاتل المتسلسل، السيكولوجية بتاعتهم دايما بتبهرني،طريقة التفكير، الخلفية بتاعتهم، الحاجات اللي بتوصلهم إنهم يقوموا بالأفعال البشعة دى ودايما بتلاقي حاجات مشتركة بين طفولتهم واللي اتعرضوا له وبين أفعالهم دي".
وفي سياق أخر عبرت الفنانة دانا حمدان عن رغبتها في المشاركة في أعمال تحمل طابع التحقيق وتشيد ببرنامج القصة الكاملة للإعلامي سامح سند وفكرة تنفيذه كمشروع درامي تحت إشراف المخرج مجدي الهواري.
وأضافت مجيبة عن رأيها الشخصي في طلب الفنان للعمل قائلة: "ليه لما الفنان يطلب شغل الناس بتاخدها بطريقة وحشة مهو لازم يقول أنا عاوز أشتغل ده الطبيعي وده ميقللش من حد رغم إننا عارفين ومقدرين أن أخر عشر سنين عدد الممثلين زاد جدا والمسلسلات أقل من أنها تستوعب كل العدد ده لكن لا يصح إلا الصحيح لازم الممثل ياخد فرصته".
الجدير بالذكر أن الفنانة دانا حمدان فنانة موهوبة قامت بالعديد من الأعمال المهمة ما بين أفلام ومسلسلات كمسلسل العراف ، مليكه، حواديت الشانزليزيه وأفلام لما بنتولد ، سعيكم مشكور يا برو، وأيضا خاضت تجربة تقديم البرامج كبرنامج حساء الأخوات وصناعة محتوى ترفيهى اجتماعى علي منصات التواصل الاجتماعى.