دانا حمدان لـ"وشوشة": اللي حصل في كليه الطب البيطري شئ مخزي

أعربت الفنانة دانا حمدان عن إستياءها الشديد لما يحدث في هذه الآونة من عنف تجاه الحيوانات الأليفة وخصت بالذكر الفيديوهات المتداولة حول تعذيب حيوانات مستأنسة داخل كليه طب بيطري بجامعة القاهرة.

و في هذا الشأن صرحت دانا حمدان في حوار خاص لموقع "وشوشة" وقالت: "التعذيب اللي بيحصل في كلية طب بيطري شئ مخزي بصراحة، مفيش شخص عاقل طبيعي هيقبل بحاجة زي دي".

وأضافت: علي الأقل ٥٠ ٪ من القتلة المجرمين عندهم تاريخ لقتل الحيوانات، هو في الأول بيبتدي بقتل الحيوانات وبعدين يخش على البنى آدمين علشان كده دايما إحنا بنقول يا جماعة متشجعوش علي ده، الشاب اللي يعمل ده مش هيستصعب أن هو يقتل إنسان خالص إيده هتاخد علي الموضوع زي ما بيقولوا".

وأوضحت قائلة: احنا للأسف جيلنا اتربى أن الحيوان ده نجس فبالتالي أحنا طلعنا بنخاف منهم ومبنحبهومش دي ثقافتنا كوطن عربي رغم أن الإسلام وصي بهم كأمم أمثالكم لكن احنا في البيئة بتاعتنا مفهموناش أن دي كائنات عايشة معانا علي وش الأرض والمفروض تعيش بسلام ومفيش حاجه تأذيها".

وأشارت: “أنا عمري ما افتكر أننا في الأحياء اللي كنا عايشين فيها قبل الكومباوندات بقا والكلام ده أن القطط والكلاب أذت حد ولا احنا أذيناها، الكلاب دي لو اتعقمت مش هتأذيك وأنا بتكلم عن ثقة مفيش كلب بيهجم علي إنسان لازم الإنسان يكون عمله حاجة والكلام بتاع شوفوا كلب هجم علي طفلة ده بيبقا حالات فردية ونادرة أما تحصل وعادة الإنسان هو السبب الكلب ملوش دعوة صاحبه هو اللي مشرسة الكائنات دي طبيعتها مش عنيفة”.

وأكدت عشقها للحيوانات الأليفة قائلة: “اللي مش مربي حيوان أليف مش هيستوعب قد إيه هما بيغيروا من شخصيتك.. مش هيستوعب كمية الحنان اللي عندهم، مش هيستوعب الحب اللي من غير مقابل”.

وأستكملت: "الكائن ده عمره ما ينسالك الجميل وده الفرق بينه وبين الإنسان القطة أو الكلب ممكن تأكله مرة وترجع بعد سنة هيحبك ويجري عليك بنفس اللهفة أما  الإنسان هتأكله مليون مرة و أول إيد هيعضها هو أنت".

وأضافت: "أنا أكتر حاجة بكرهها المقارنات بين الإنسان والحيوان، أنا أعيش مع الحيوان و أعيش مع الإنسان ليه لازم اختار هو ربنا لما خلقنا مش خلقنا علي كوكب واحد ولا فصلهم وحطنا في حتة وهما في حتة من حق أى إنسان أنه ميحبش يبقا معاه حيوان في البيت بس ميأذيهوش".

وعند سؤالها عن الضجة التي صنعها الكلب الذي صعد الهرم قالت: أنا فخورة به جدا سبحان الله هي صدفة أن الراجل كان بيعمل سيرفنج لكن احنا طول عمرنا عارفين إنها بتطلع وتنزل عادي الكلب البلدي قوي جدا جسمانيا علي فكرة وذكي جدا وحنون، عندي كلب بلدي اسمه سلطان فيه حنية الدنيا لو بعد الشر في يوم حصل حاجة هو اللي هيحميني".

وفي سياق أخر يعد فيلم الطاووس آخر عمل شاركت فيه  دانا حمدان،والمسلسل بطولة جمال سليمان، سميحة أيوب، سهر الصايغ، هبة عبدالغني، رانيا محمود ياسين، أحمد فؤاد سليم، هالة فاخر، خالد عليش، يوسف الأسدي، حليم، مها نصار، فرح الزاهد، عابد عناني، والمسلسل سيناريو وحوار كريم الدليل وإشراف على الكتابة محمد ناير، وإخراج رؤوف عبدالعزيز.