هاني حسن الأسمر عن والده الراحل: أبويا علمني أن البيت مكان مقدس زي المسجد
يحل اليوم الإثنين الموافق 21 أكتوبر ذكرى ميلاد فنان عظيم له بصمة واضحة ومؤثرة في عالم الغناء الشعبي، إنه الفنان الراحل حسن الأسمر، رائد من رواد الأغنية الشعبية.
وتحدث الفنان هانى حسن الأسمر في حوار خاص لـ"وشوشة" عن والده الفنان الراحل حسن الأسمر في ذكرى ميلاده موضحا الكثير من التفاصيل حول حياته وعلاقته بفنه وأسرته.
موضحا أن يوم ميلاد "حسن الأسمر" لم يكن يحتفل به خصيصا بل كان احتفال جماعي للأسرة كلها قائلا: "يوم عيد ميلاده كان بيبقى عيد ميلادنا كلنا أنا وأخواتي".
كما كشف عن حزم والده وتجنبه للحفلات داخل المنزل قائلا: "أبويا علمنا أن البيت ده مكان مقدس زيه زى الجامع فيه أمك وأخواتك ممنوع منعا باتا أي حد غريب يدخل.. حسن الأسمر راجل صعيدي شرقاوي فعندنا عادات وتقاليد محدش بيجي عندنا البيت إلا من رحم ربي".
وأوضح هاني عن علاقة والده بمن حوله في الوسط الفنى أو خارجه قائلا: "عمره ما كان له خلاف مع حد كان يقول كل الناس إخواتي وأصحابي و مكنش عنده أصدقاء مقربين لأن إحنا عندنا حاجة كده أن سرك جواك لو انت قلت سرك لحد متزعلش لو فضحك وقاله، إذا كان انت مقدرتش تشيل سرك هو هيشيلهولك".
وأضاف " هاني" حول ذوق والده الفنان حسن الأسمر فى الأغانى كمستمع قائلا: “كان بيحب يسمع محمد عبد الوهاب ومحمد فوزي والست أم كلثوم، وعميد الموال الأستاذ عبده الإسكندراني”.
وكشف معبرا عن رأيه الشخصي وحبه وتقديره للفن الشعبي قائلا: "مينفعش حد يقلل من الفن الشعبي، الفن الشعبي هو أساس الفن من أيام الشيخ سيد درويش والناس العمالقة بتاعة زمان، الفن الشعبي كانوا بيحاربوا به الاحتلال".
وأستكمل: “لازم نفرق بين المهرجانات والفن الشعبى، الفن الشعبي جاي من قلب الشارع من قلب الناس علشان يوصل أوجاعهم وفرحهم و دلوقتي بقا في فقر في اللحن مفيش ابتكار زي زمان، أي حد ممكن يسرق لحن وغيره يسرقه منه وغيره وغيره".
وتابع: "أنا أخدت من أبويا حاجات كتير أوي، أخدت منه إنى أعرف إزاي أقيم الشئ، أخدت منه إزاى أفكر في الحاجة مرة واتنين وتلاتة قبل ما أخد القرار، أخدت منه إزاي الواحد يكون عنده كرامة وعزة نفس حتى في شغلي وصاني لازم اختار الكلمة الكويسة وتكون قريبة من الناس".
وتحدث هاني الأسمر عن رأي والده في موهبته قائلا: "عمره ما قالي انت بتغني حلو أو وحش، قالي أنا شهادتي فيك مجروحة عيش التجربة بتاعتك بنفسك لو الناس حبتك كمل محبتكش خدها من قاصرها وشوفلك حاجه تانية، عمره ما اتوسطلي".
واختتم حديثه كاشفا عن آخر أعماله وهى أغنية "أولاد الحرام"، كلمات إبراهيم الشناوي، ألحان خالد سلطان، توزيع فلسطيني ويعد بمفأجاة كبيرة في 2025 في انتظار الإعلان عنها.