شيري عادل لـ"وشوشة": انفصالي قسمة ونصيب ولو كان عندي أطفال كانت وجهة نظري هتختلف

حلت الممثلة شيري عادل، ضيفة في ندوة فنّية بموقع "وشوشة"، بحضور رئيس التحرير الكاتب الصحفى عمرو صحصاح، وعلقت على ظروف انفصالها أثناء مسلسل الوصفة السحرية.

وقالت شيري عادل خلال ندوتها عبر "وشوشة": مفكرتش أربط بين الشغل وحياتي ومحستش خالص إن الناس هتربط بين حياتي وشغلي نهائيا.

وأضافت: إحنا بناخد 24 قيراط في الدنيا، ومش بحس إني معنديش حظ أو كدة عشان انفصلت، محدش فينا هياخد حاجة أكتر من التاني فهي أرزاق متوزعة مظبوط.

وتابعت: موضوع إني بحب كل حاجة مثالية وكدة لأ مبفكرش كدة كنت كدة زمان، دلوقت بقول قسمة ونصيب والواحد بيحمد ربنا وخلاص، وكله نصيب.

وأردفت: لما بحس إني مش عاوزة أكمل مع حد بمشي، هي فجأة بتحس كدة إنك مش عاوز تستمر، عشان منظلمش نفسنا أو الطرف الآخر، ودي وجهة نظري، يمكن لو كان عندي أطفال ممكن وجهة نظري هتختلف.

مسلسل الوصفة السحرية من تأليف ورشة مصنع الحكايات لمؤسسها المؤلف هاني سرحان، وتدور أحداثه حول مشاكل الزواج والعلاقات الرومانسية والاجتماعية من خلال نماذج مختلفة من الأزواج، ويطرح العمل سؤال هل هناك وصفة سحرية لو عرفناها سنصل إلى السعادة وستحل جميع مشاكلنا؟، والوصفة السحرية لزواج ناجح هو اسم الكتاب الذي تتحرك من خلاله الأحداث لتتغير حياة الأبطال تماما.

يشارك فى بطولة مسلسل الوصفة السحرية كلاً من: شيري عادل، بسمة داوود، إسلام جمال، عمر الشناوي، كارولين عزمي، هيدي كرم، لقاء سويدان، سلوى محمد علي، وليد عبد الغني، رانيا منصور، محمد أبو داوود، عماد رشاد، سلوى عثمان، والعمل من تأليف مصنع الحكايات لمؤسسها هاني سرحان، وفكرة مي سعيد، وإشراف على الكتابة دعاء عبد الوهاب، وسيناريو وحوار منة فوزي وإيرين يوسف ومي سعيد وإخراج خيري سالم.