" دعاء وصدقات".. وصايا كتبها تامر ضيائي قبل رحيله بشهرين

رحل عن عالمنا، اليوم، الفنان تامر ضيائي، حيث أعلنت خبر الوفاة هند سعيد صالح خلال حسابها الشخصي على موقع " فيسبوك ".

كتبت هند سعيد صالح: ' لا حول ولا قوة إلا بالله،  الصديق العزيز الفنان تامر ضيائي في ذمه الله، من فضلكم الدعوة له بالمغفرة".

وقبل الوفاة بشهرين، وبالتحديد يوم 12 مايو الماضى، قد نشر وصيته الخاصة في منشور عبر حسابه الشخصي على موقع “فيسبوك “، قائلا: ” ده هيفضل باين علي صفحتي لحد ما أموت، الحقيقة اللى كلنا عارفينها ومتأكدين منها إننا كلنا ربنا كتبلنا إننا نموت فى ميعاد محدد غير معروف، وعشان كده كتبت الكلام ده لأنى محتاج حاجات معينه تتعمل و حاجات خايف تتعمل وأنا مش عايز حد يعملها لمجرد إنها معروفه، ووقتها طبعاً مش هعرف أقولها لحد ودي وصيتي، صلاة الجنازة أهم من العزاء و هى إللي كل ما العدد زاد كل ما ثوابي ما كان أكتر، فأرجوكم تصلوا عليا، مش شرط تيجي العزاء وياريت لو إتعمل فى البيت أو مكان بسيط بفلوسه تطلعولي صدقة جارية أفضل”.

أضاف:"من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، رجاء دى بالذات بلاش وإدعولى الوقت اللى هتقروا فيه جزء فضوا نفسكم وإقعدوا إدعوا فيه، بلاش صدقة جارية تقليدية وسهلة ومش مستفاد بيها يعنى المصاحف كتير فى مصر أوى وكل بيت فيه كتير فممكن نحط الفلوس فى جامع بيتبنى أو كرسى متحرك فى مستشفى يستفادوا بيه المرضى أو دخول مياه لبيت غلابه أو بناء سقف لبيت فقراء، حاجات ناس تستفيد بيها لمدة طويلة".

واختتم حديثه قائلا: ' دى نقطة مهمة أوى بالنسبة ليا، محدش يقول لحد بتعيط عليه لية، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم و مفيش حاجه بتقول إن العياط معناه عدم رضا بقضاء ربنا "وأبيضت عيناه من الحزن فهو كظيم"، كمان أهم حاجة تانى هى الدعاء وبس والصدقة، ومن فضلكم تكثفوا الدعاء وقت نزول القبر وتتصدقوا بأى حاجه بنية إن ربنا يجعل قبرى روضه من رياض الجنه ويثبتنى عند السؤال لأن ده أهم وقت ليا وياريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى فى ليلة زى دى، الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى فى سعادة لحد ما أقابلكم تانى".