أسماء جلال اعترفتله بحبها.. زوجة وائل جسار: حلوة هاتها ضرة ليا

علق الفنان وائل جسار على تصريح الفنانة أسماء جلال واعترافها بحبها الشديد لها وأنها ستتزوجه، وكشف عن رد فعل زوجته بعد سماعها لهذا الحديث.

وقال وائل جسار في تصريحات إعلامية: "من باب المزاح قالتلي البنت حلوة خلاص مفيش مشاكل تجيبها ضرة عادي".

وتابع جسار ليكشف كيف رد على زوجته قائلا: "قلت لها أنا عندي إنتي بالدنيا كلها، هي متفهمة أن جوزها فنان وليه معجبات وعندها ثقة فيا وفي نفسها وإني اخترتها من بين ملايين البنات".

وعن تصريح أسماء جلال عنه قال وائل جسار: "أسماء جلال اتكلمت بعفوية لا مثيل لها هي تلقائية، وقالت إن وقتها كانت صغيرة، صراحة أنا مش فاكر الموقف اللي حصل، لكن أنا عايز أشكرها من كل قلبي على حبها ليا ولأعمالي الفنية وبتمنى لها كل خير ويارب دايما تبهرنا بأعمالها، هي هتبقى نجمة كبيرة، وربنا يوفقها في حياتها وتستاهل كل خير".

واستطرد: "فوجئت بالكلام وهي قالت مع منى الشاذلي ياريت ميعرفش الكلام ده، لكن بالعكس أنا حبيت ثقتها بنفسها وإنها بتواجه وتقول كل حاجة حاسه بيها وبقلبها وقليل جدا اللي بيكون كده".

أسماء جلال: بحب وائل جسار

وكانت أسماء جلال قد تحدثت خلال لقائها في برنامج "معكم" مع منى الشاذلي عن تعلقها الكبير بوائل جسار قائلة: "بحبه جدا.. كنت الشخصية الملزقة اللي بحط صوره في كل حتة، وبعدين الموضوع تطور وبقيت غريبة الأطوار جدا وبقيت أحضر حفلاته كلها".

وأضافت: "بقى لما يعمل حفلة أكون أول واحدة عارفه مكانها فين وأحجز ترابيزة كاملة ليا عشان أركز معاه، وكنت ألبس فستان حتى لو الناس حواليا لابسة عادي عشان يشوفني، مع إنه متجوز .. فمش فاهمة أنا كنت بعمل ايه".

واختتمت: "طبعا ولا أخد باله مني خالص لحد ما في مرة أعتقد خاف مني وقتها، لأن روحت له كنت عاوزة أتصور معاه، فقلت له عارف إننا هنتجوز؟ قالي والله!!.. كنت صغيرة والله العظيم وقتها يا جماعة.. لسه بحبه بس مش بعمل زي زمان، وربنا يبارك له في مراته وولاده".