عدوية شعبان عبدالرحيم لـ"وشوشة": رضا البحراوي شغال بسرقة أغاني الناس ومن غيرها ملوش وجود في مصر

اشتدت حدة الخلاف والمشادات اللفظية بين الفنان عدوية نجل الفنان الراحل شعبان عبد الرحيم، والمطرب رضا البحراوي، بعد تقديم الأخير أغنية عدوية بعنوان "صغير أنا"، مشيرًا إلي أن البحراوي رفض فكرة غناء الأغنية معه.

وقال عدوية في تصريح خاص لـ"وشوشة"، ردًا على اتهام البحراوي له بأنّه يشعر بالغيرة من نجاحه: مش هرد على حاجات تافهة لكن أنا هغير منك ليه يا رضا، وأنا طول الفترة اللي فاتت كنت بدافع عنك ولحد دلوقت متخانق مع حسن شاكوش ومبكلموش لدلوقت.

وأضاف: وأنا بقولها دلوقت ومن خلالكم، أنا بقول لشاكوش وعمر كمال حقكم عليا إني وقفت مع رضا البحراوي ضدكم، في أي يوم من الأيام، وحقكم عليا إني وقفت معاه.

وتابع: أنا رفضت إني أعمل غنوة تانية معاه لأنه خد أغنيتي وفضل يغنيها، وحرقها خلاص واتهرست، وطلبت منه نغنيها سوا، فقالي نعمل غيرها وأنا رفضت دة.

واستطرد: رضا البحراوي قالي نعمل أغنية تانية عشان في نيته كان يشتغلني ويسكتني ويفضل يغني أغنيتي لحد ما اتهرست وماتت ومعرفتش أخدها وأسجلها.

وتوعده خلال حديثه، قائلًا: طول منا عايش وبيعمل تصرفات تضايقني في الأغنية هفضل أرد عليه في كل حتة، لحد آخر لحظة كنت شاري خاطره لكن هو اللي مصمم يخسرني، على الأقل اعمل تقدير لأبويا اللي عمل معاك واجب أنت وكل مطربين مصر.

ووجه عدوية للبحراوي رسالة خلال حديثه قائلًا: "أوصيه ونصيحة مني لله ميسرقش أغاني تاني من مطربين، سيبكم مني أنا في مطربين غلابة بيسرق أغانيهم وينجح بيها وكل أغانيه سارقها ومش دافع فيها فلوس، وهو شغال على سرقة الناس ومن غير كدة ملوش وجود في مصر.

بداية الأزمة

وفي بادئ الأمر، نشر نجل الراحل شعبان عبد الرحيم مقطع فيديو عبر حسابه الشخصي بالفيسبوك، وأعرب من خلاله عن استيائه من غناء البحراوي لأغنيته، قائلًا: عايز أقول لكل الناس إن أغنية صغير أنا، اللي رضا البحراوي بيقدمها بقاله 5 أيام، دي بتاعتي ومن ألحاني، وكلمات إسلام خليل.

أضاف عدوية شعبان عبد الرحيم: رضا البحراوي اتصل بيا واستأذني وقالي عايز أغني الأغنية دي في الأفراح وافقت، ولما لقيته كل يوم بيغنيها مش بيعمل حاجة في حياته غير يغني الأغنية بتاعتي ويستغلها.

وتابع: فطلبت منه ييجي نسجلها مع بعض لكن رفض، وقالي الأغنية دي اتهرست وهو اللي هرسها، وهي بتاعت أبويا بقالها 20 سنة، ولكن أنا زودت عليها حاجة، وموجودة بصوتي على اليوتيوب.

مشادات لفظية

ثم عاد وكتب منشورًا عبر فيسبوك وجه خلاله رسالة تهديد للبحراوي قائلًا: يارضا يابحراوي ياحرامي الأغاني والأفكار ماتغنيش الاغنية تاني 
أنا مش عايز اغلط لحد دلوقتي، عشان أنا باقي عليك ماتخلنيش ازهق واعمل حجات تزعلك مني.