عبير صلاح الدين تفتح النار على محمد صبحي

كشفت الفنانة عبير صلاح الدين لأول مرة خلافها مع الفنان محمد صحبي، وعدم تعاونها معه في الأجزاء الأخيرة من مسلسلهما الشهير "يوميات ونيس"، والذي شاركت به بشخصية "عبلة".

وأضافت خلال لقائها ببرنامج "كلام الناس" المذاع علي قناة "ام بي سي مصر": "لما عملنا الجزء السادس لمسلسل يوميات ونيس، وجينا نعمل الجزء السابع مكنش ينفع ان احنا نكمله لإن كان فيه مط وتطويل وخلافات بين الممثلين ومحمد صبحي".

 

وتابعت: "خلال تصوير الجزء السابع من مسلسل يوميات ونيس، حصل فيه مشكلات وتوقف التصوير في 2009 لمدة 6 شهور وخلال الفترة دي الناس اتخانقت مع بعض ومشيوا واضطرينا نعيد التصوير بناس جديدة بدون الحصول علي أجر".

 

وأردفت: "كملنا الجزء السابع  لمسلسل يوميات ونيس واحنا في شد وجذب، وبالرغم من كده كان الفنان محمد صبحي بيقولي انتي عبلة وهتفضلي عبلة اللى في شخصية المسلسل وهتبقى معانا في الجزء الثامن، وقتها كنت متضايقة جدا لأن الأجواء مكنتش كويسة الي جانب ان كان فيه مط وتطويل بدون داعي في الحلقات".

 

ولفتت: "لما خلصنا الجزء السابع اتعرض عليا الجزء الثامن فقلت لأ لإني مش عايزة احرق شخصية عبلة والناس تكرهها".

 

وأكدت: "قعدت من 2010 الي 2015 بحاول اشتغل وكل الابواب بتتقفل في وشي بسبب رفضي المشاركة في الجزء السابع مع محمد صبحي اللى اخد مني موقف  لحد لما جالي اكتئاب وقررت اسافر كندا ولسه راجعة مصر من كام يوم، وفيه ناس قالولي لو عايزة تشتغلي روحي استسمحي الاستاذ محمد صبحي علشان ترجعي تشتغلي وإلا هتقعدي زي ناس كتير، فرفضت".

واستطردت: "جالي احساس ان محمد صبحي عايز يقولي انا اللى عمتلك نجمة وعملتلك شخصية في يوميات ونيس وانا اللى هموت نجوميتك".