إيناس الدغيدي: رفضت أحمد عز أول مرة.. ويسرا اختارته عشان يبوسها
الخميس 04/أبريل/2024 - 12:40 ص
إيناس الدغيدي
جيجي محمود
علقت المخرجة إيناس الدغيدي على طريقة اختيارها للممثلين قائلة: "مش مغرورة لكن شكلي مغرور، وعمرو سعد مكسرش المكتب عندي، هو حد كلمني قالي في ولد كويس أوي هيجيلك المكتب عشان عايز يمثل، وأنا مكنتش موجودة، ومكلمنيش قبلها، وقالها أنا مش همشي وقاعد أستنى، فاكر إنها مخبياني عنه، وهو كتب لي جواب، بس عرفت الموضوع ده بعد ما بقى عمرو سعد".
وقالت المخرجة إيناس الدغيدي، خلال استضافتها ببرنامج "أسرار" مع الإعلامية أميرة بدر المذاع على قناة النهار: "بقابل في اليوم 40 واحد عايزين يمثلوا، واخترت أحمد عز من كاست وكان موديل إعلانات، رفضته في الأول، عشان مكنش مناسب سنًا، عشان كان أصغر من يسرا ومش هينفع، الفيلم كان فيه بوسة، ويسرا جات قالتلي مين الراجل اللي هيبوسني، قلتلها جايبالك واحد كويس، كان فيلم كلام الليل، عشان مش عايزة تتباس من أي حد، لما شافته قالتلي هو ده اللى اخترتيه، طب انتي بصيتي على سنانه، مش هينفع أبوسه عشان سنانه كلها سودة، والمنتج كان مقتنع بـ أحمد عز عشان وسامته، وراح قال ليسرا فيه واحد كويس أوي بس إيناس شايفة إنه صغير، لما شافته قالتلي ده أنا هبوسه لكن اللى انتي مختاراه مش هينفع، قلتلها ده صغير، قالتلي ماليش دعوة، وعمل الدور حلو جدًا، والبوسة طلعت حلوة، وبعدها راح اتعلم وجالي قالي عايز أعمل فيلم، عملت به مذكرات مراهقة، وعز تطور جدًا، ومجتهد ومركز عنده هدف".
