علاء مرسي يكشف رأيه الصادم في نبيلة عبيد ونادية الجندي وأحمد حلمي‎

قال الفنان علاء مرسي ، أصعب حاجة على الفنان أن يُرفض ويشعر بالرفض له أو الإهمال وشوفنا أستاذ توفيق الدقن العملاق ده قاعد على كرسي في المسرح ساكت بالأربع ساعات على ما يجي مشهده ويدخل وإحساسه بالزعل بعد النجومية والأضواء والتاريخ ميكونش دي نهايته.

وأضاف من خلال لقائه ببرنامج "ع المسرح" المذاع على قناة "الحياة"، لكل شئ نهاية والبقاء لله، ولكن منعجلش إحنا بالإعدام لأي فنان مهما كبر سنه، ومتنساش الجيل اللي سلمك لإنك أنت لاشئ من غيره لإن هو اللي علمك وعرفك، مينفعش نموت جيل لصالح جيل ولا نعمل الجيل القديم ولما نسافر برة نلاقيهم بيحبوا الجيل القديم مش الجديد ويتحدثوا عن الجيل القديم.

وتابع: الفنانة نادية الجندي والفنانة نبيلة عبيد والفنان أحمد حلمي قلت عليهم مبيعرفوش يمثلوا، وسياق الحديث إنهم نادية ونبيلة نجمات كبار ونجوميتهم اكبر من حجم الموهبة أي أن عندهم إدارة الموهبة أكبر من الموهبة نفسها، الزعيم الفنان الكبير عادل إمام الوحيد اللي عنده الموهبة والكاريزما والاحتواء والذكاء وحسن الإدارة وكل الحاجات والجدعنة وطيبة القلب.

وقال: أحمد حلمي عنده ذكاء فطري واجتهاد رهيب وألومه في أنه نجم مش عايز اشوفه مهزوز أنا متعود عليه إيراداتك عالية وأفلامك كلها ناجحة مينفعش متنجحش، ولك أطفال بيحبوك ومسئوليتك كبيرة في اختياراتك لذلك أنت مينفعش تبقى نجوميتك أكبر من عملك.