كريم قاسم : مسلسل "زينهم" أحسن حاجة حصلتلى في 2023 وشخصية جيمي متلبّساني
الخميس 28/ديسمبر/2023 - 01:56 م
كريم قاسم
منار بدرالدين
قال كريم قاسم مع نهاية عام 2023: إن مسلسل "زينهم"، أحسن حاجة حصلت لي السنة دي ودي حاجة كويسة الواحد يقفل بيها السنة»، وعن شخصيته «دكتور جيمي» قال: «الشخصية متلبسين أوي وأي حد من أصحابي يشتكي لي من حاجة في جسمه بقيت بقول له وريني كده واقعد أفسر له وأتحقق من الموضوع.. كنت متخيل الموضوع هيبقى اصعب من كده لكن اللذيذ إن الكاتب طبيب فكان في مصطلحاته وتفسيره ساعدنا، وكان فيه أصدقاء دكاترة ساعدونا وبرده من كتر الفرجة على شخصيات الدكاترة قبل كده».
وتابع: «التركيز في المسلسل أكثر على القضايا والجانب الاجتماعي للشخصيات والمخرج بذكاء حاول يتفادى مناظر الجثث والإصابات علشان يبقى مناسب للأطفال والعيلة مع إنه كان يقدر يدخل في التفاصيل».
وأوضح كريم قاسم: «أول ما قريت الورق حسيت إن جيمي ده دوري ومكتوب لي لأني كنت متخيل هعمل فيه إيه، والتي تنفذ كمان عدى اللي كنت متخيله بعد التعاون مع المخرج اللي كان فاهم جدًا وكمان الشغل مع أحمد داوود زي لعب الكورة و بنساعد بعض وكنا داخلين ننبسط و كنا محضرين كويس».
وأكد: «كنت خايف طبعًا، ولأول وهلة دخول المشرحة رغم إنها ديكور لكن كأنها مشرحة حقيقي وفيها قبضة، ومع أول جثة وتصوير كان الموضوع بيخض لحد لما اتعودنا بعد كده».
مسلسل «زينهم» بطولة أحمد داوود، كريم قاسم، سلمى أبو ضيف، هناء الشوربجي، محمد أبو داوود، أحمد الرافعي، عماد رشاد، وآخرين، تأليف محمد سليمان عبد المالك، وإخراج يحيى إسماعيل.
