أول تعليق لـ منة عرفة بعد عودتها لزوجها
الأربعاء 10/نوفمبر/2021 - 09:12 م
علياء أحمد
أعلنت الفنانة منة عرفة، عودتها لزوجها محمود المهدي، بعد انفصالهما عن بعضهما خلال الأيام الماضية.
و كتبت "منة" عبر حسابها علي "انستجرام": "من أصعب اللحظات اللي ممكن تعدي على أي ست لحظة الانفصال وخراب البيت.. الطلاق يهتز له عرش الرحمن ، لكن انتوا يمكن عشان بتسمعوا عن بيوت بتتخرب كل دقيقة فبقى أبغض الحلال عند الله بالنسبالكم نكتة أو حاجة تتمسخروا عليها".
وتابعت: "رهان بتعملوه مع بعض على إننا مش هنكمل ومادة خام للشماتة فينا، خراب البيت عمره ما كان حاجة سهلة على الست أو على الرجل أو على أهالينا.. في عز ضعفي وحزني وكسرتي اللي ربنا ما يكتبها على أي ست مرحمتونيش ولا قدرتوا إني في موقف لا أحسد عليه وشمتانين فينا".
واستكملت: "قد إيه إنتوا ناس متعرفوش ربنا ولا في قلوبكم رحمة، اتمنوا الخير لبعض يا جماعة، بلاش نشمت في بعض، لكن دي غلطة إن أنا شاركتكوا حياتي الشخصية.. الإنسان بيغلط عشان يتعلم وأنا اتعلمت، ربنا يعينكوا على نفسيتكوا الجحيم دي وعسى أن تكرهوا شيئا وهو خير لكم".
وأضافت: "يمكن الخلاف اللي حصل كشف لنا ناس كتير حوالينا، كانوا بيمثلوا إنهم فرحانين لينا بس الحقيقة إنهم كانوا مستنيين أول مشكلة عشان يشمتوا في كسرتي وخراب بيتي، بس والله ربنا مش هينولهلكم ، وربنا يخليلي أهلي وزوجي والناس اللي بتتمنالي الخير ووقفت جنبي".
وأعلنت الفنانة الشابة منة عرفة، عقد قرانها على محمود المهدي، في حفل عائلي جمع أسرتي العروسين فقط، في يونيو الماضي.
