بعد آخر تصريحاتها.. نجوم الفن يفتحون النار على حلا شيحة

أثارت الفنانة حلا شيحة الجدل من جديد بعد أن تبرأت من فيلمها الجديد "مش أنا" مع النجم تامر حسنى وكشفها عن راأيها فى الفن، مما دفع عدد من الفنانين للتعليق علي تصريحاتها عبر صفحاتهم على مواقع التواصل الاجتماعي:

علق الفنان تامر حسني، على تصريحات حلا شيحة الأخيرة عبر صفحته الرسمية على "فيس بوك": "الحقيقه عمري ما بتخيل إني أدخل في نقاش بالشكل دا مع زميل بحترمه و كان في بينا كل خير، للتوضيح بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصياً و نتناقش بيني و بينك  ، فا أنا مضطر  أرد هنا برضه". 

وتابع: " أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي  أوعد و أخلف الحقيقه اني إحترمت  كلامي معاكي، وعدتك أشيل مشاهد تانيه طلبتيها وشيلتها بالفعل وشكرتيني عليها ولو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف".

وأضاف: "انتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع، وبقيتي تقفلي تليفوناتك و تكنسلي علينا كلنا  وبعدين أي فيلم بيبقى ليه خطه مسبقه في الدعايه وانتي عارفاها كويس و وافقتي عليها و ده كليب رومانسي يعني معقول  كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني  مثلاً  هو دا يُعقل؟".

واختتم تامر حسني، حديثه معاتبًا حلا شيحة، قائلا: "أنا زعلان منك جدًا يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كده وهكتفي بالتوضيح دا و ربنا يهدي الجميع و يكتبلك كل الخير اللهم آمين".

وردت الفنانة منة فضالي، على تصريحات "حلا" قائلة: "مش تجريح بس مينفعش قبل الجواز كلام، وبعد الانفصال كلام، وجواز تاني كلام ونجرح في الزملاء، اللي ملهومش ذنب، هو حد ضربها على إيديها، تصور المشاهد دي، وبعدين ترجع تقول كلام تاني".

وكتبت رندا البحيري منشورًا، عبر حسابها الشخصي بموقع التواصل الاجتماعي "فيس بوك"، قائلة: "هو محدش فهمها أن اللي بتعمله ده ممكن يعرضها للمساءلة القانونية، وأنها بتضر بسمعة فيلم وبالتالي إيراداته؟".

وتابعت: "بتتكلم عن ممثل ونجم بحجم تامر حسني بالشكل ده أكنها أحسن منه، وإحنا كلنا عارفين الخير اللي بيعمله تامر طول عمره، في الخفاء وفي العلن على إيدينا كلنا، فضله على ناس كتير أوي، وربنا جعله سبب لفتح بيوت قد كده، وهي تنصحه، لا والله هم يضحك".

وكتب أحمد الشامي تغريدة، عبر حسابه الشخصي بموقع التغريدات القصيرة "تويتر": "والله أنا مبسوط من كل الردود أن الناس فاهمة، أن كل ده أكل عيش، وأن لو الشهرة فتنة وهي مقتنعة كانت هي بنفسها قفلت كل  السوشيال ميديا، ووقفت كلام مع صحافة".

وكتب ماندو العدل عبر حسابه الشخصي بموقع التواصل الاجتماعي “فيس بوك”، وقال: ياريت بس لما تطلقي مترجعيش تقولي عايزة أمثل تاني يا أستاذة حلا".