محمد يحيى يكشف لأول مرة أسرار بدايته مع عمرو دياب

كشف الملحن محمد يحيى، عن أسرار بدايته مع المطرب عمرو دياب، لافتا إلى أن أول أغنية قام بتلحينها كانت "ريحة الحبايب" وكان عمره حينها ٢٠ عامًا.  

وأضاف "يحيى" خلال لقائه مع الإعلامي أحمد الهواري، ببرنامج "وشوشة" المذاع على قناة "النهار": "كنت ساكن في أوضة فوق السطح، وكان بعيد عن فكري أشتغل مع عمرو دياب، وفجأة لقيت حد من الجيران مشغل أغنية للهضبة، وكنت وقتها في رمضان، وقلت لنفسي طيب ليه مشتغلش معاه".

وتابع: "وقتها كلمت الشاعر الراحل محمد خليل وقلت له أنا نفسي اشتغل مع عمرو دياب، فرد قالي عمرو بيروح استوديو صوت الحب كل يوم الساعة ١٢، و روحت انتظرته في القهوة قدام الاستوديو، وأول ما شوفته اتخضيت، وحاجة إلهية قالت لي يعني إنت قاعد كل ده علشان تتخض، وروحت له واتجرأت وعرفته بنفسي، والحمد لله وقتها كان موده كويس، وسمعته أغنية وتصادف أنه في هذا اليوم كان يقوم بتسجيلها".

وأردف: "الهضبة قالي يا بني الأغنية دي أنا لسه كنت بسجلها، هو إنت اللي عاملها؟، قلت: أيوة أنا اللي عملتها، وأعطاني ميعاد لمقابلته في الأستوديو مرة أخرى، ومن هنا توالت اللقاءات".

وأشار "يحيى" إلى أنه يحرص كل عام على المشاركة في ألبوم الهضبة، بألحان جديدة ومختلفة تنال إعجاب الجمهور.