| هو فنان ومطرب موهوب بورسعيدي الأصل.. فخور ببلدته الأم وموطنه الذي حارب العدو وانتصر عليه باستخدام السلاح الأبيض.. فنان قريب إلي القلب وحينما تراه تشعر وكأنك تعرفه.. هو علي الألفي.. مشروع فنان ناجح في بداياته.. وكان لنا معه هذا الحوار.
* بدايتك مع الغنا جت إزاي ؟
ـ في الحقيقة هما 3 بدايات غير بعض.. أول بداية.. كنت زي أي طفل موهوب كان عندي سرعة حفظ.. خصوصا إن إحنا وقتها كان عندنا حاجات كتير جميلة نحفظها ونتعلم منها.. يعني كان فيه نيللي، صفاء أبوالسعود، لبلبة، الفوازير.. أول مرة بقي عرفت فيها إني بعرف أغني.. وأنا صغير كانت أنغام منزلة ألبوم وقتها اسمه "لاليلي لالي".. شبطت في الشريط ده جدا وما كنتش بسمع غيره لدرجة إني حفظت كل الأغاني اللي فيه وبقيت بغني زي أنغام بالظبط بعدها بقي رحت للمدرسة بتاعة الفصل وقلت لها بكل ثقة "علي فكرة أنا بعرف أغني" وغنيتلها.. وفي وقتها أخدتني من إيدي لمدرسة الموسيقي وغنيت أول مرة علي مسرح في المدرسة وأنا عندي سبع سنين.
تاني بداية وأنا في الجامعة.. كنت بحاول بأي شكل أعرف الناس إني بعرف أغني.. كنت كل سنة باخد لقب "أحسن صوت" علي مستوي الجامعة كلها.. لحد ما طلعلي لقب "سوبر ستار جامعة قناة السويس" في آخر سنة.
تالت حاجة.. لما إتعرفت علي ملحن إسمه "أحمد عاصم".. سمعني بالصدفة ووقتها هو كان بيكون فرقة اسمها step by step =-2>وعرض عليا إني أكون معاه في الفرقة وأغني معاهم في الساقية .. جابلي cd=-2> عليه الأغاني وحفظتها في بور سعيد وجيت قبل الحفلة بـ3 أيام عشان البروفات.. وما كنش حد يعرفني في الفرقة لأنهم كانوا بيتدربوا علي الموسيقي لوحدهم من غير ما يعرفوا مين اللي هايغني.. أول مرة أغني في القاهرة كانت في الساقية في الـ cultural week. وبعد كده انضميت لفرقة «أيامنا الحلوة».
> إنت قلت إن أنغام كانت مثلك الأعلي في الغنا. مين غيرها بتعتبره مثل أعلي؟
ـ أنغام كانت ولا تزال مثلي الأعلي في الغنا.. لدرجة إن أنا قعدت فترة طويلة فاهم إن الغنا يعني جزء أنغام والجزء التاني مش أنغام ، لما كبرت وفهمت شوية في المزيكا عرفت قد إيه الست دي عظيمة ودقيقة في إختيارتها لأنها محافظة علي خط معين ليها ما حدش بيعرف يعمله غيرها ده غير إن اختيارتها تحترم جدا بدليل إنها حتي لما بتيجي تقدم حاجة تجارية للسوق بتكون مميزة ومختلفة عن كل اللي في الساحة من غير ما تفقد أي شيء من أصالتها في الغنا.. وطبعا عمرو دياب.. يعني إزاي الراجل ده قدر يفضل أكتر من 25 سنة سوبر ستار وشاب في وسط الشباب.. ومع ذلك إحنا كلنا عندنا ذكريات طفولة ومراهقة عيشناها مع أغاني عمرو دياب.
* إيه جديدك ؟
ـ أنا بحضر دلوقتي لحفلة مع فرقة " أيامنا الحلوة " في المسرح المكشوف الأوبرا يوم 13 أغسطس ونزلت أغنية ليا سنجل إسمها " مش لازم " بتتكلم عن الحب من طرف واحد وإن شاء الله هاتكون في نجوم إف إم قريباً.
* بتتمني إيه ؟
ـ بتمني إني ألاقي شركة إنتاج تقف جنبي وتدعمني.
* طب إنت ليه لحد دلوقتي مش متعاقد مع أي شركة إنتاج؟
ـ لأن الحكاية طلعت مش بالمثالية اللي احنا كنا متخيلنها.. لازم الواحد يكون عنده علاقات ووسايط حتي في الفن.
* نفسك توصل لإيه في الغنا؟
ـ نفسي إن أغنيتي يسمعها جمهور المسرح الكبير في الأوبرا والناس اللي راكبة "التوك توك" يعني نفسي أكون مسموع في كل بيت وكل واحد يلاقي نفسه في أغنية من الأغاني اللي بغنيها. 
|